SRH-ah mi pakhat dah lut thar
State Referral Hospital (ZMC)-a rinhlelh thila damlo dah luh tawh sate chhuahtir vek tawh an nih laiin, cancer vanga damlo, Vellore aṭanga haw chu nimin khan dah luh thar a ni thung a, damlo enkawltu pakhat pawh enthlak turin damdawi-inah dah hran (isolate) mek a ni.
State Referral Hospital (SRH)-a Covid-19 vei enkawl mek chu Isolation ward-a dah lailawk a nih hnuah Pathianni khan ICU-ah dah luh leh a ni a, a dinhmun erawh a ṭha zel tih, SRH-ZMC bulletin chuan a tarlang.
Sorkar thuchhuah tarlan danin, Mizoramah entry point/screening point hrang hranga enfiah tawh mi 76,587 an awm a, chu'ng zinga 815 chu Pathianni tlai dar 5 leh nimin tlai dar 5 inkara enfiah an ni. Nimin tlai dar 5 aṭanga a hma lam darkar 24 chhungin quarantine centre-a dah luh thar mi 524 awmin, home quarantine-ah dah thar mi 68 an awm a; Rapid Anti Body Test of India (RATI) neih zat mi 281 awmin, RATI neih tawh zawng zawng chu 1,085 a ni.