Ruihhlo kan kuta awm tawh hnu Tihchingpen a ni ngai lo - Excise deptt.

Excise & Narcotics department (END) hotute chuan, ruihhlo an man tawh, an kuta awm tawhte tihchingpen a awm ngai lo tih an sawi a, "Dan angin tihral a ni ṭhin a, ruihhlo kan hâlte hi a tak tak vek a ni," an ti.

END hotute hian nimin khan an commissionerate conference hall-ah commi­ssioner Ngurchungnunga Sailo hoin thuthar thehdarhtute an kawm. END hotute chuan, chief minister Lal Thanhawla'n ruihhlo hâl ṭhinah a tak tak hâl a nih leh nih loh chian a ngaih thu leh a mantute

aṭanga ruihhlo tihchingpen a awm leh awm loh belhchian a ngaih thu a sawi chu END secretary hoa an sawiho hnuah, an kalphung sawifiah tura thuthar thehdarhtute thingpui inpui an nih thu an sawi.

END hotute sawi danin, an thil mante an tih zui danah an páwng kawl tawp ngai lo a; Supreme Court duh dan zuiin sorkarin notification a chhuah a, chumi ang chuan ruihhlo dahnate pawh thuneitute'n an endik a, an pawmpui thlap a ni.

Ruihhlo tihral dan tur ngaihtuahtu tur Disposable Committee din a ni a, chu chuan Court-in a chinfel tawhte tihrîral dan tur an ngaihtuah ṭhin. Ruihhlote chu tuam ṭhat a nih hnuah magistrate-in an endik leh vek a, chumi hnuah tihrîralna hmun turah an dah ṭhin.

Ruihhlote chu man an nih hnuah magis­trate hmaah a thla lak vek ṭhin a ni a, document atan hman zui ṭhin a ni. Dan ang chuan ruihhlote chu incinerator-ah hâl ral tur a ni a, State Referral Hospital, Falkawna incinerator-a hâl ral tura ruahman ni mah se, a têt deuh avangin hâl ral hman a ni lo.

Secretariat Complex-ah hâl ral a nih ṭumin sawiselna a awm avangin hman chhunzawm a ni lo a, a hnuhnung bera hâl ralna Brigade Field, Bawngkawn pawh hman zui theih a nih hmel lo a, a tihralna turah harsatna a awm mek.

Ruihhlo an hâl ral dawn reng rengin a endikna hmanrua (test kid) chhawp vek ṭhin a ni a, a duh tan chuan ruihhlo tuamnate phelhin test kid hmang hian endik theih vek a ni.

Ruihhlo mante tihchingpen a nih lohna atan an khauh hle tih sawiin END hotute chuan, "Kan strict loh chuan ṭawp deuhin hna kan thawk ang tih kan hlau. Hrem pawh kan ngah tawh a, inhrem loh chuan hna kan thawh ṭhat loh a hlauhawm. Hna kan thawh ṭhat loh chuan mipui thlawpna kan hmu thei lo ang. Chief Minister sawi anga ruihhlo tihchingpen a awm kan hre lo a, kan eizawnna a nih avangin kan la ná. Kan nihna nia kan hriatte sawi ve ṭha kan ti a ni," an ti.

END hotute chuan, tun hmaa ruihhlo mante tihchingpen a awm leh awm loh an hriat loh thu sawiin, "Kan hriat chinah chuan tihchingpen a awm lo. Kalphung a ṭhat loh lai chuan a lo awm pawh a ni mai thei a, kan hriat chinah chuan kan man a, kan kuta lut tawh chu a chhuah leh kan hre lo. Court-a evidence atan kan la chhuak a, kan dah leh mai ṭhin a ni," an ti a; CM Hawla thusawi chu tun hma thil a nih chuan rinhlelh chu an neih thu an sawi.

Ruihhlo man tawh la chhuak leh turin thlêmna an tawh nasat ṭhin thu sawiin END hotute chuan, "Cheng nuai tam tak min lo offer ve ṭhin a, mahse, kan la duh ngai lo. Lo tiru duh pawh ni ila kawppui neih a ngai a, kan kawppuite'n an sawi chhuak thei. Thil sual ti tur hian tumah kan insawipui ngai lo hrim hrim," an ti.