E.Roll enkawlna thar ERONet tlangzarh

Mizoram Election department hotute chuan nimin khan Aizawl Press Club-ah thuthar thehdarhtute an kâwm a; internet hmang electoral roll enkawlna tur ERONet chu nimin khan tlangzarh a nih thu an sawi.

Chief electoral officer (CEO) SD Shasank chuan, ERONet chu video conferencing hmangin district tina DC hmuh laiin tlangzarh a nih thu a sawi a, "Sorkar laipui chuan ERONet hi August 15 hmaa tlangzarh turin a ti a, a hun pelh hmain kan tlangzarh thei ta a ni. Electoral roll enkawlna thar hi ṭangkai taka hman a nih ngei kan beisei," a ti.

Election department hotute sawi danin, ERONet hi roll enkawlna software hman mek ERMS aia kawng tam taka tha zawk tura ngaih a ni a, electoral roll enkawltute hna a tihawlsam phah a beisei a ni. Electoral roll a thil dik tawk lo awm thei hrang hrang transfer leh chhan dang avanga hming chuang nawn, hming leh elector chungchang dang diklo, kum tling lo roll-a chuang, leh thil dangte a tihbo deuh vek theih rin a ni.

Zawhna chhangin Election hotute chuan, electoral roll-a inthun luh dilna pawh ERONet hmangin a tih theih tih an sawi a, "Application a luh hnuah spot verification neih leh vek a ni ang. Roll-a inthunluh danah chuan tun hmaa kalpui dan thoa kalpui a ni ang a, hearing-ah tlawmngai pawl leh political party-te pawh an tel leh vek ang," an ti.

ERONet Ṭangkaina
Mipui tan
w Online-in application a thehluh theih a, application-in a thlen chin sms notification hmangin a diltu hriattir zel an ni ang. Online application thehluhna hi nvsp.in a ni.
w Constituency danga insawn (transfer) dawnin awmna hluia hming paih kher a ngai lo, awmna thar roll-a a luh hunah a system hmangin an lo delete mai dawn a ni.
w Online-a application thehluh a nihin a process chhung a rei lo lehzual tura ngaih a ni a, hun rei lo te chhungin application approve/reject a ni thei ang.
Thawktute tan
w ERONet atang hian data entry zawng zawng tih tur a ni a, application hrang hrang te chu Electoral Registration Officer ten verification ṭul ang an tih hnuah ERONet aṭangin an approve/reject ṭhin dawn a ni. Mobile site leh mobile app version-te a awm avangin awlsam takin office-a ṭhut lai kher loh pawhin hna a thawh theih dawn a ni.
w Mobile aṭanga hna a thawh theih avangin broadband internet neih kher lohnaah pawh hna a thawh theih ang a, tin, internet data a mamawh a tlem vangin internet chak lutuk lohna hmunah pawh hna a thawh theih dawn a ni.
w Data entry atan offline mode a awm avangin internet ṭhat loh lai pawhin data entry chu a tih theih reng dawn a, a hnuah a upload leh mai theih dawn a ni.
w Official pawimawh CEO, DEO te leh ERO ten an bial chhung ṭheuha electoral roll dinhmun hrang hrang chu dashboard hmangin an endik thei reng dawn a, summary roll revision lai pawhin a thawktute hna thawh zat a endik reng theih dawn a ni.