Citizenship Amendment Bill-ah ZNP-in sorkar an phût nawn

Zoram Nationalist Party (ZNP) thuneitu sang, National Executive Commitee chu nimin khan an party pisaah an ṭhukhawm a, president Lalduhoma’n a kaihruai. Citizenship Amendment Bill, 2016 dodalna kawnga hma la turin Mizoram sorkar an phût tih an tarlang.

ZNP NEC meeting chuan resolution an pass a, "Tunlaia kan buaipui mek Chakma leh The Citizenship Amendment Bill, 2016 chung­changah hian party leh NGO zawng zawngte'n lung­rual taka hmalakho ṭul kan tih thu vawi eng emaw zat kan au chhuahpui tawh a. Chumi bawhzuia hma latute an awm mek hi lawmawm kan ti a, an hmalakna hi kan thláwp a, lo ngaihchan zel rih ni se kan ti. Sorkar hi a hmahruaitu ber a nih a ṭul kan tih avangin, sorkar hi rang taka rawn che nghal turin kan phût nawn leh bawk," an ti.