Tlawng lui hnára tuikhuah tifai

Zobawk Joint YMA chuan August 12, Inrinni khan an khaw kianga Tlawng lui hnára an khaw tui lakna, PHE deparment enkawl Recharging Dam tifaiin an hnatlang.

Zobawk Joint YMA hruaitute chuan, Zobawk Tlawng hnára PHE tuikhuah chu PHE department-a thawkte'n theih­tawp chhuahin an tifai ṭhin tih an sawi a; mahse, an indaih loh avangin kum tìra ruahmanna an lo siam tawh angin YMA-in tihfai hnatlang nei huaihawt ta tih an sawi.

Hnatlangah hian Zobawk khuaa YMA branch pali aṭangin member 184 an thawk chhuak a; tui a tam avang leh ruah a sûr nasat avangin duh angin tuikhuah chhung erawh an tifai thei lo. Tlawng hnára tuikhuah hian tui litre nuai 250 vel a dawng anga ngaih a ni a, hnatlanga an tihfai avang hian litre nuai 270 vel a dawn theih tawh beisei a ni.