MPC-in district-a puan mipuite lainat

MPC party office bearer-te nimina an party pisaa an president Lalhmangaiha Sailo hoa ṭhukhawm chuan thuchhuah an siam a; MNF sorkarin Saitual, Khawzawl leh Hnahthial-te district headquarters atana a puan tawh, tun thlenga tihpuitlin a la nih loh vanga bial mipui beidawnga kûn mekte an lainat thu an tarlang.

MPC chuan, MNF sorkarin district headquarters atana an puante chu duhsak tak tak ni se, kum 10 an sorkar chhungin an tihhlawhtlinsak hman ngei tura ngaih a nih thu an sawi a, "An term tawp dawn ruaiah chauh vote zawnna hmanrua atan maia hma an lak avangin an beisei ang a thleng zo ta loah kan ngai," an ti.

Independence Day boycott ngai hial khawpa khua leh tuite beidawnna thlentuah Congress sorkar puhin MPC chuan, "Hei hian Congress leh MNF party-te hi Zoram mipuite tan belh tlak an nih lohzia a tilang chiang hleah kan ngai," an ti a; vanduai­thlak an tih thu an sawi.

MPC chuan, Mizorama inkalpawhna kawngpuite a chhe vel vek nia sawiin, "A siamṭhatna tura contractor-te'n fund an lak tawh a nihna ang taka an kalpui loh vanga khaw mipuite'n thawhlawmte khawn a, hnatlanga siamṭhat hna an thawk ṭhinte hi vanduaithlak kan ti a, Mizoram sorkarin ram mipuite aia an sangáwi zawnpui contractor-te an ngaih pawimawh zawk ṭhin avangin mipuite chu force labour chanchangah min chhuah taah kan ngai a, a thanatthlak kan ti tak zet a ni," an ti.

MPC party chuan, August 12, 2017 zinga CM Lal Thanhawla’n Khatla East a tlawh ṭum a, Aizawl khawpui felfai tâwk lo chhuanlamah Kumpinu sorkar a puh chu thu belhchian dâwl lo a nih thu an sawi a; Brig. T Sailo kaihhruai PC sorkarin Aizawl Capital Expansion Project a duan tawh Congress sorkarin a chhunzawm duh loh vanga Aizawl khawpui chu chêp ta a nih zawk thu an sawi bawk.