Ruihhlo dona turin Mizorama kohhrante an tawngtai rual

Mizorama kohhran hrang hrangte chu August 13, Pathianni zan inkhawm­ah khan ruihhlo ngaite pualin an ṭawng­ṭai rual.

Ṭawngṭai rual tur chung­changah hian Mizoram Koh­hran Hruaitute Committee (MKHC) chuan August 9, 2017 khan thuchhuah siamin, kohhran pawl hrang hranga tualchhung kohhran tinte chu August 13 zan inkhawmah ruihhlo laka Mizoram a fihlîm theih nan leh ruihhlo bâwiha táng mekte tan ṭawngṭai rualna hmang tur leh, chutiang lam hawi Pathian thuchah sawi turin a ngen a ni.

MKHC ngenna angin MKHC-a tel kohhran pawl hrang hrang hruaitute chuan an kohhran ṭheuhah ṭawngṭai rual tura ngenna an tichhuak leh a; August 13, Pathianni zan inkhawm­ah kohhran hrang hrangte chu an ṭawngṭai rual ta a ni.

MKHC general secretary Rev. R Lalrinsanga chuan, "Social Welfare department aṭangin sorkarin ngenna a rawn thlen a, MKHC-in kan ngaihtuah a, kohhran tinte ruihhlo laka kan ram a fihlim theih nan leh ruihhlo ngaite chhan chhuah an nih theih nan ṭawngṭai rual turin kan inngen a ni," a ti. MKHC ngenna chu kohhran pawl hrang hrangin an bawhzui ṭha hlea an hriat thu a sawi bawk.