Cooperative Board of Directors ṭhukhawm

Nimin khan Aijal Club-ah Mizorama state level cooperative society hrang hranga Board of Directors an ṭhukhawm a, Cooperation minister C Lalrinsanga leh chief secretary Lalnunmawia Chuaungo ten an hmanpui. Cooperative hmanga ram leh hnam tihhmasawn kawnga thawhho dan tur leh hmalak dan tur an sawiho.

Chawhma lama khuallian Lalnunmawia Chuaungo, chief secretary chuan, India ram state danga hna a thawh laiin cooperative society-te hmalakna leh kalphung entawn tlak a tihte a sawi a; Mizoram chu state dang aiin kawng hrang hrangah a ṭhan chak thu sawiin, "Duh ang diak diakin ṭhang lo mah ila, keini aia state upate cooperative lama an ṭhan dan ngaihtuahin, kan ṭhang duang em em a ni," a ti.

Lalnunmawia Chuau­ngo chuan, economy tiṭhang turin cooperative society a pawimawh thu sawiin, "Self sufficiency hi tunah chuan thil pawimawh ber a ni tawh lo a, self reliance hi tunlai khawvel kalphung a ni tawh a, chutah chuan cooperative society hi a pawimawh a ni," a ti a; Cooperation department-te chu facilitator a nih thu sawiin, sorkar hmalakna leh hmachhawpahte inrawlh tur leh sorkar finchhuah ṭhin turin a chah.

Chawhnu lam inkhawm­ah khuallian C Lalrinsanga, Cooperation minister hoin society hrang hrang hruaitute'n thawhhona ṭha tak neia an kal dan tur an sawiho a; Minister chuan, "Thawhhona ṭha tak neia cooperative society hrang hrangte thawhho a pawimawh," a ti a, cooperative movement tichak tura sorkar inrawlh a pawimawh dante a sawi.

Meeting-ah hian Mizoram State Cooperative U­nion, APEX Bank, MIZO­FED, PIGFED, MAHCO, MAHFED, SERIFED, ZOFISFED, MULCO leh WOMENFED-a chairman leh director-te an tel a ni.