CM hoin ei leh bara intodelhna tur sawiho

Chief minister Zoramthanga kaihhruaiin nimin khan Agriculture department officer-te CMO Cabinet mee­ting room-ah an ṭhu a, Co­vid-19 kaihhnawiha department hmalakna leh hmachhawp an sawiho.

Chief Minister chuan, buh leh bâla intodelh chu Mizoram mamawh leh sorkarin a ngaih pawimawh ber a nih thu sawiin, "Ei tura intodelh leh mipui hriselna hi hmasawnna atana pawimawh hmasa ber, SEDP hmalakna pawhin a tum a ni," a ti a, ram hmasawnna hna dang nen a kal kawp zel tur thu a sawi.

Meeting-ah hian, thlai chî phai lama chah ngai loa intodelh a nih theihna tura Agriculture (Research and Extension)-in buh chi ṭhenkhat, kawlbahra leh thlai danga an hmalakna te, lo neitute tana ruahtui khâwl leh tui kawng 

ṭha siam te, mechanization atana hmalakna leh Task Group on Agricultural Inputs hmalaknate an sawiho a ni.

Ṭhukhawma an tarlan danin, Union Finance Minister-in a puan tawh angin, Covid-19 vanga loneitute'n harsatna an tawh palh theih tur laka invèn nan PM-KISAN hnuai­a loneitu 80,888-te bank account-ah April  22, 2020 thlengin Rs. 16,1 7,76,000 thun a ni tawh.

SEDP hnuaiah kumin­ah Agriculture department-in ram acre 2,500-a zauah vaimim quintal 174 chîntir an tum a, vaimin chi, a venhimna hmanrua­te chah thleng tawhin, lo neitute'n a hun taka an dawn theih nan DAO-te hnenah sem chhuah a ni. Meeting chuan, vaimim chi quintal 201.47 chah belh ni se tiin a rél.

Sub Mission on Agricultural Mechanisation (SMAM) hnuaiah custom hiring center 50, power tiller 75, mini power tiller 75 leh paddy transplanter-te subsidy-a pek tura rua­hman a ni a, power tiller sem chhuah ṭan a ni tawh. District tinah chul rih uar turin an fuih a; leilet aṭanga buh thar a tlak­hniam loh nan mechanization scheme (custom hi­ring center) emaw FOCUS aṭangin emaw lei lehsak tura ruahman mek a ni.