Independence Day lawm a ni NLUP kan tihbelh zel dawn - CM

Nimin khan India ram pumah Independence Day (I-Day) vawi 71-na lawm a ni a; Mizoramah pawh Aizawl, district khawpui tin leh khaw dang ṭhenkhatahte lawm a ni. Aizawla I-Day lawmnaa khuallian, chief minister Lal Thanhawla chuan, NLUP hmanga ei zawnna hmu mi tam tak an awm tawh tih sawiin, "Mi 1,30,000 kan tuam tawh a, kan la tihbelh zel dawn," a ti.

Chief Minister chuan sorkar hmalakna leh hnathawh hrang hrangte a sawi a; NLUP hmangin mi sang tam takin eizawnna an hmuh thu leh an sum lak luh a pun thu sawiin, "NLUP hi kan la tihbelh zel dawn a, NEDP hmangin kan tiphuisui lehzual dawn a ni," a ti a; retheihna chu chhungkaw tam takte ni tin khawsakna mamawh neih theihna dâltu a nih chhung chuan NLUP kalpui chhunzawm a nih tur thu a sawi.

Mizoram chhungah kawngpui tam tak siam mek a nih thu sawiin Lal Thanhawla chuan, "Kawngpuite hi ṭhal a nih veleha siam turin sorkarin hma a la mek a ni," a ti. Kaladan Multi Modal Transit Transport Project siam mek chu zawh a nih hunah chuan Mizoram chu Asia chhimchhak lam ramte luhkapui a nih tur thu a sawi a, "Latawhah airport siam tumin hma lak mek a ni a, Lengpui Airport ang vel airport siam theih tura mithiamte'n an ngai," a ti.

Lal Thanhawla chuan, kawlphetha hnianghnâra mipuiin an neih theihna tura sorkar hmalak mek hrang hrangte a sawi a; "NEDP hnuaiah hnuaiah Vankalah kawlphetha megawatt 20 siam chhuak theih tur Mega Solar Park siam mek a ni," tiin, Tlungvelah pawh megawatt 2 siam chhuak thei tur solar energy bun tum a nih thu a sawi.

Sorkar laipuiin ruahtui khâwl a ngai pawimawh tih sawiin CM Hawla chuan, "Rain water harvesting hi kan ngai pawimawh dawn a, BPL chhungkuate hnenah a ṭul angin tuizem kan pe dawn," a ti. Thianghlimna leh faina chungchang sawiin, Aizawl, Champhai leh Kolasib district-te chu pawn lama inthiar awm lohna, Open Defecation Free (ODF)-ah puan a nih tawh thu leh, Serchhip district pawh puan mai theih tura endik mek a nih thu a sawi a ni.

CM Lal Thanhawla chuan, Mizo ṭhalai tam tak ruihhloin a tihbuai thu sawiin, ruihhlo do kawngah YMA leh sorkar thawkhoin nasa taka hmalak a nih thu leh Social Welfare department lamin ruihhlo ngaite enkawlna lamah hma an la nasa niin a sawi a, "Ruihhlo hi kan hmelma lian ber pakhat a ni ta a, ruihhlo do beihpui thlak a ngai," a ti.

Ram ni pawimawh hmannaa parade-a tel zirlaite an tluk ṭhin chungchang sawi langin CM chuan, "Zuk leh hmuam in ti lo a nih pawhin, Tiranga, Gutkha, Passpass in tih ṭhinte hi vaihlo vek a ni a, hengte tih hian tlûk a awl em em. Heng lakah hian in fihlîm a ngai," tiin a sawi.

Chief Minister chuan, Prime Minister kaihhruaina hnuaiah collective federalism kalpui a ni a, ramin hma a sawn mek tih a sawi a, "Mizoram pawh hmasawn zelin, NITI Ayog-in a chhiar dan chuan state ṭhang chak ber pali zingah dah a ni," a ti. Mizoram mamawh ber chu rinawmna, dikna, taimakna leh Pathian nung ṭihna dik a ni tih a sawi a; "Zoram thar, Zoram nuam nuam kan siam dawn a ni," tiin, sorkar hmalaknate ṭawiawm tura mipui a sáwm.

CM Lal Thanhawla hian 'Quit India Movement' kum 75-na puala New India thutiam (pledge) a chhiar chhuak a, a chhiar chhungin mipui an ding. A chhiar zawhah Chief Minister chuan, "Secularism-te tel se a lawmawm lehzual tur," a ti.

Lammuala I-Day lawmnaah hian parade contingent 28 an tel a, armed contingent panga, unarmed contingent paruk, school contingent 13 leh band party pali an tel. Parade commander chu Lalhmangaihhlua, DSP a ni a, 2nd. commander chu Victor Zothansanga, DSP a ni. I-Day lawmnaah hian minister pahnih - R Lalzirliana leh R Romawia te, MLA te, sorkar officer liante leh mi eng emaw zat an tel.

New India Pledge
w Let us together pledge that by 2022; we build a New India
w Let us together pledge towards a Clean India
w Let us together pledge towards a Poverty free India
w Let us together pledge towards a Corruption free India
w Let us together pledge towards a Terrorism free India
w Let us together pledge towards a Communalism free India
w Together let us strive whole heartedly to accomplish this pledge for a New India