Saitualah total bandh huaihawt a ni ; Independence Day lawm theih a ni lo

Saitual District Implementing Demand Committee bultumin, nimin khan Saitual district puan tawh tihpuitlin phûtin Saitual khawpui huam chhungah tobal bandh huaihawt a ni a; hei vang hian Independence Day lawmna hmun hman theih a ni lo.

Saitual leh a chhehvela total bandh huaihawt hi zing dar 5-ah ṭan niin, tlai dar 5 thleng kalpui tum a ni a, mahse, mipuiin an thlawp ṭhat avangin chawhma dar 11:40-ah tihtawp a ni.

Bandh chhungin Saitual, Keifang, Sihfa, Rúlchàwm leh Ruallunga sorkar building-te leh dawr zawng zawng khâr vek a ni a, khawlaiah lirthei leh mipui veivak an awm lo a; buaina chhuak hriat a ni lo.

Thu dawn danin, Saitualah hian I-Day lawmna hun hman tum a ni a, a hmanna tur Saitual khelmual pawh chei vek tawh a ni. Mahse, total bandh avangin I-Day lawm theih a ni lo.

I-Day lawmnaa khuallian tur R Lalrinawma, Assembly deputy speaker chu SDIDC hruaitute leh tualchhunga ruling party hruaitute'n Keifang dái, Khuangthlikawn petrol pump bulah lo tidingin, khaw chhung lut lo turin an ngen a, Deputy Speaker chu Aizawl lamah a let leh a ni.

Deputy Speaker hian a aiawha Saitual SDO (Civil) quarters kawta hnam puanzar pawt pharh turin SDO(C) R Vanlalsawma hnenah a hlan; chu chu mipuite'n hrethiam loin, SDO(C) quarters kawtah an pungkhawm nghal. Mipui thunun theih an nih loh avangin SDIDC hruaitute chuan SDO(C) quarters kawtah pawh hnam puanzar pawh pharhtir lo mai turin Deputy Speaker chu an ngen leh a; Deputy Speaker chuan hrethiamin, hnam puanzar pawh pharh a ni lo.

Thuthar thehdarhtute hmaah SDIDC hruaitute chuan, tharum tel loa district tihpuitlin an ngiat mekna a kal zel thei chu lawmawm an tih thu sawiin, sorkar pawh tharum thawh kher nghak loa an duhnate tihpuitlinsak thuai tura an duh thu an sawi a; total bandh vanga harsatna tâwk zin veivâkte chungah thupha an chawi a ni.