KHAWTHLIR

Raj Bhavan hall
Governor Lt. Gen. Nirbhay Sharma leh chief minister Lal Thanhawla te chuan, nimin khan Raj Bhavan-a Multipurpose Hall sak zawh thar an hawng. Raj Bhavan sak ṭhat nan 13th. Finance Commission aṭangin cheng vbc. 30 leh state sorkar aṭangin sum eng emaw zat hmuh a ni a; chu sum hmang chuan Multipurpose Hall pawh sak niin, a chhungah dawhsan leh badminton court dah a ni.

Minister-in hawng
Health & Family Welfare minister Lal Thanzara chuan, nimin khan Kolasib District Hospital-a Casualty siam rem thar leh pianphunga rualbanlote leh kum upate tana inthiarna tur bik siam thar chu a hawng.

Oxygen khawl pe
Mamit bialtu MLA John Rotluangliana chuan nimin khan Mamit District Jail, District Hospital leh Observation Home a tlawh a; damdawi-inah hian damlote thilpek a pek bakah, thuneitute hnenah oxygen concentrator khawl pahnih a pe.

Bangla hawng
Mara Autonomous District Council bangla thar chu nimin zing khan Finance minister Lalsawta'n a hawng. MADC bangla hi cheng nuai 262 sênga sak a ni a, March 28, 2012-ah sak ṭan niin, July 5, 2017-ah sak zawh a ni.

YMA-in pui
Sialhawk Branch YMA chuan kum tina an tih ṭhin angin, nimin khan an branch huam chhunga kut hnathawka eizawng, eng emaw harsatna vanga mahni hna thawk hlei thei lo chhungkaw pahnih chu ramvah leh hlo thlawhah an pui a; mi ṭhahnem tak an thawk chhuak a ni.

Lusûn khawhar
Information Commissioner L Hrangnawna (71) h/o Biakveli, Electric Veng chu August 14, Thawhṭanni zan dar 7 khan cancer vangin a thi a, nimin khan vui a ni. L Hrangnawna hi MPS-ah a lut a, chumi hnuah IPS-ah a kai a; sorkar hna aṭanga a pension hnuah Mizoram Information Commission-ah informartion commissioner hna a chelh leh a ni.