Hmun hrang hrangah I-Day lawm a ni

India ramin zalenna a hmuh ni, Independence Day vawi 71-na chu Mizoram hmun hrang hrangah nimin khan lawm a ni a, Mizoram sorkar hotute'n an hmanpui.

Lungleiah chuan minister H Rohluna'n a hmanpui a, hnam puanzar pawt pharhin, parade contingent 25-te'n hnam puanzar chibai an bûk a chháng let.

H Rohluna chuan, India ram zalenna atana nunna leh theihna hlu tak hlantute inpekna leh inhlanna avangin India chu khawvel sor­kar ropui berte zinga mi a ni tawh tih sawiin, "Vantlang himna leh muanna boruak vawng him tura dan leh thupek kenkawh sorkarin a ngai pawimawh a, dan kengkawhtute leh mipuite thawhhona ṭha avangin Mizoram hi state muanawm berte zing a mi a ni," a ti.

I-Day pual hian tennis, table tennis, snooker leh pool, badminton, shooting leh football-ahte inelna buatsaih a ni a, a ti ṭhate hnenah H Rohluna hian lawmman a hlan a ni.

Siahaah chuan District Playground-ah lawm a ni a, minister Lalsawta'n parade contingent 19-te'n hnam puanzar chibai an bûk a chhang lêt.

Lalsawta chuan, Mizoram leh a chhunga chengte hmasawn nan sorkarin a bitum tur a bitum chat zel dawn tih sawiin, "Mipui pawhin kan tih tur ṭheuhah rinawm tak leh taima taka ti tura kan inpuahchah ve a ngai a ni," a ti. I-Day lawmna pual hian football, badminton leh air rifle shooting-ah te intihsiakna buatsaih a ni a, lawmman late hnenah hian khuallianin lawmman a sem a ni.

I-Day hi Champhaiah chuan minister PC Lalthanliana hoin Chhangphut Field-ah lawm a ni a, parade contingent 25-te'n hnam puanzar chibai an bûk.

PC Lalthanliana chuan, ram pum huapa zalenna hman chu ram tan inpekna thûk zawk nei tura inhlan thar nan leh zalenna lawmna chu min fuihtu atan leh hmasawnna kawnga thui zawk pên nan hmang turin mipuite a sáwm a, "He ni pawimawh takah hian India ram zalenna atana nunna hlu tak hlantu martarte zahna chibai bûkin, India zalenna a tana hma hruaitu ropuite kan hriat reng a pawimawh," a ti.

Kolasib-ah chuan Ṭumpui Field-ah hman a ni a, minister Lal Thanzara'n hnam puanzar pawt pharhin, parade contingent 18-te'n hnam puanzar chibai an bûk chu a chháng let.

Lal Thanzara chuan, I-Day hmang tura kal khawm zawng zawngte zalenna ni chibai bûkin, ram tana inpekna thûk zawk nei tura fuih thartu atana hmang turin a sáwm a, "Sorkarin mipui tan a hna thawhte langtlang leh rintlak a nih theih nan kawng hrang hrangin hma a la a ni," a ti. Minister hian I-Day puala football tournament buatsaiha ti ṭhate hnenah lawmman a sem nghal.

Serchhipah chuan I-Day hi Khawtetlang DC playground-ah minister Zodintluanga hoa lawm a ni a, parade contingent 15-in hnam puanzar chibai an bûk.

Zodintluanga chuan, hnam dangte awpbehna hnuaia zalenna kan neih theihna tura hruaitu ropui Mahatma Gandhi, Jawaharlal Nehru, Sardar Vallabhai Patel leh ram hruaitu dang te, sipai huaisen, ramin zalenna a hmuh theih nana nunna hlantute leh tha leh tui sengtu zawng zawngte zahna chibai a bûk tih a sawi a, "An thawhrah senga zalen taka hun hmang mekte'n kan hriatreng a pawimawh," a ti.

I-Day hman zawhah I-Day puala Border Security Organisation, 199th Battalion-te'n ralthuam an phochhuah chu Minister ho hian mi pawimawhte'n an en a ni.

Lawngtlaiah chuan I-Day hi CYLA Playground-ah lawm a ni a, parliamentary secretary TT Zothansanga'n parade contingent-te hnam puanzar chibai bûk a chhang let. Lawngtlai district-a mimala thisen pe tam Elvis Lalthangzuala (unit 28) leh nikum chhunga a thlawna pawl hminga thisen pe tam ber College Veng Pastor Bial LIKBK Ṭhalai Pawl (unit 98)-te hnenah chawimawina hlan a ni.

TT Zothansanga chuan, India ramin zalenna a hmuh theih nana an theihna, thiamna leh nunna hial hlantu hnam pasalṭhate zahna chibai bûk a, ram zalenna ní chu inremna din tharna nía hmang tur leh zalenna sualtute hmathlir tihlawhtling tura lung rual taka thawk ho turin kal khawmte a chah.

I-Day pual hian Lawngtlai District Independence Day Celebration Committee chuan Lawngtlaia damdawi-in pathum - District Hospital, Lairam Christian Medical Centre leh Christian Hospital Lawngtlai bakah, Lairam Motherless Home leh District Jail-ahte ṭanpui Rs. 2,000 ṭheuh an hlan.

Mamitah chuan I-Day hi Mamit GSA Playground-ah bialtu MLA John Rotluang­liana hoa hman a ni a, parade cintingent 19-te'n hnam puanzar chibai an bûk. John Rotluang­liana hian parade-a tel zirlai zawng zawngte sikul pheikhawk a pek tur thu a puang a ni.

John Rotluangliana chuan, kal khawmte duhsakna chibai a bûk a, "Zalenna atan hma hruaitu ropui Mahatma Gandhi, Netaji Subhash Chandra Bose leh mi dangte thawh rah hre renga, ram pum huapa zalenna ni kan hman hi ram tana inpekna thûk zawk nei tura inhlan thar nan i hmang ang u," a ti.

Indenpendence lawmna pual hian Mamit district chhung tan football, volleyball leh badminton tournament buatsaih a ni.

Independence Day hi district khawpui bakah khaw hrang hrangah lawm a ni a, parliamentary secretary, MLA leh sorkar official-te'n an hmanpui a ni.