Cabinet minister zinga Lal Thanzara'n Parl.Secy. a nei lo bik a mak - Dr Thangtea

MNF, Phuldungsei group chuan nimin khan Phuldungsei community hall-ah Socio Economic Development Programme (SEDP) zirhona an buatsaih a; MNF vice president Dr R Lalthangliana'n hmanpuiin, Congress sorkara Cabinet minister zinga Lal Thanzara'n thachhang dâwltu parliamentary secretary a nei lo bik chu thil mak a nih thu a sawi.

MNF Vice President chuan, "Cabinet minister dangte'n parliamentary secretary an nei vek a, Pu Lal Thanzara chiahin thachhang dâwltu parliamentary secretary a nei lo bik hi a mak hle. A department-a thuneihna zawng zawng a pumhmawm vek bik hi induhsakna bik uchuak tak a ni," a ti.

Dr R Lalthangliana chuan, Congress sorkar kum kua dáwn a kal tawh chhunga a tak taka thuneitu leh roreltu chu mi pahnih/khat chauh an nia sawiin, "Congress sorkar nasa taka timualphotu, mipui pawhin nasa taka kan tawrhna thlentu department enkawltute chu Chief Minister leh a nau hi an ni," a ti a; mi tlemtêin thuneihna an pumhmawm chu tam tan a pawi a, ramin a tuar nasa hle niin a sawi.

MNF Vice President chuan, Dampa constituency chu sorkarin a ngaihthah hle nia sawiin, inthlan lehah MNF a sorkar chuan Dampa bial hmasawnna nasa taka kalpui a nih tur thu a sawi bawk.

MNF thuchhuah chuan, Phuldungseia SEDP zirhonaah hian MNF zawm thar voter 10 a lawm lut a, nimin veka West Phaileng YMA Information Centre-a SEDP zirhonaah an party zawm thar mi 102 a lawm lut niin an tarlang.