Covid-19 vei Mizo thihna Health Minister-in pawi a ti

Health minister Dr R Lalthang­liana chuan, AMRI Hospital, Kolkata-a enkawl lai Mizo damlo, Covid-19 kai hmuh chhuah tawh zinga pakhat a thi chu pawi a tih thu a sawi a, "Covid-19 vei dangte theihtawp chhuaha kan ṭawngṭaipui bakah, enkawlna ṭha an dawn theih nan hma kan lak mek laia Mizote zingah ani kan chán hi ka thinlung a khawih tak zet a ni," a ti.

Health Minister hian nimin khan thuchah tichhuakin, AMRI Hospital-a enkawl lai Mizo cancer vei zinga pathumin Covid-19 an vei tih tun hnaiah hmuh a nih thu a sawi a, "Covid-19 vanga boral ta hi sorkar laipuiin inkaihhruaina dan a siam zawm a ngaih avangin Mizoramah rawn hawpui theih a ni lo a, Mizo invui dana thlah liam a nih theih nan kawng hrang hrangin hmalak a ni a, kan beisei leh duh anga thil a kal vek thei lo erawh a pawi hle a ni," tiin, sorkar thuneitute remruatna leh ruahmanna zawm a ngaih thu a sawi.

Kolkata-a Mizo, cancer vanga damlo awm mek zingah Covid-19 vei pahnih an la awm thu sawiin Dr R Lalthangliana chuan, a ṭul anga lo ngaihven turin West Bengal-a mi­nister of state for Health Chandrima Bhattacharya leh Dr Nath Ari a biak thu leh anni pawhin hma an lak thu a sawi a, "Cancer lam mithiam bika an neih chu Mizo cancer-te din­hmun enpui turin an ruat a ni," a ti.

Health Minister sawi danin, Kolkata-ah Covid-19 vei mi pahnih an la awm bakah, damlo enkawltute leh Mizoram House-a Covid-19 kai hlauhthawnawma ngaih mi 23 chu khung hran mek an ni a; Kolkata Mizoram House assistant resident commissioner Jacob Lalawmpuia leh a thawhpui te, Calcutta Mizo Welfare Association leh Kolkata Mizo Students' ten a ṭul angin an buaipui ṭhin.

Dr R Lalthangliana chuan, Mumbai Mizoram House-a Co­vid-19 positive pariat hmuh chhuah zingah parukin an vei tawh lo a, pahnihin an la vei tih sawiin, "Mizo cancer vei inenkawl mek pakhat leh hnam dang Mizoram House-a thawkte an ni. Tunah hian pali chu dam fel tawha puan an ni a, mi dang pahnih pawh hi test negative tawh sa an ni," a ti.

Health Minister chuan, State Referral Hospital-a Covid-19 vei enkawl mek chu a dinhmun a ṭhat zel thu sawiin, "A negative a ni tihchianna turin ni li chhung a záwna sample test tur an lak pawh Silchar Medical College-ah thawn a ni a, rei lo têah result hriat a beisei a ni," a ti a; Shillong-a Covid-19 vanga thi ta Dr John Sailo chhungte zinga hripui veite pawh an negative vek tawh tih a sawi bawk.