Mizoram sorkarin thla 5 chhungin Loan cheng vbc. 626.35 a pûk
Mizoram sorkar chuan sorkar kum kal mekah April aṭanga August 28, 2022 thlengin hmun hrang hrang pali aṭangin loan cheng vaibelchhia 626.35 a pûk tawh.
RTI Act hmanga Vanglaini zawhna Finance department-in a chhan danin, Mizoram sorkarin sorkar kum kal mekah August 28, 2022 thlengin loan chi li a pûk tawh a, chu'ngte chu Open Market Borrowing (OMB), NABARD, NCDC leh REC aṭangin a ni.
Mizoram sorkarin loan a pûk tamna ber OMB-ah ṭum li a pûk tawh a, a pûk zawng zawng belh khawm chu cheng vbc. 540 a ni. A pûk tlemna ber NCDC aṭangin ṭum khat chiah pûkin, cheng vbc. 1.85 a pûk a ni.
Financial year 2022-23 chhunga OMB hman Reserve Bank of India aṭanga sum pûk phalna Mizoram sorkarin a neih zat chu cheng vbc. 990 a ni a, tun dinhmunah cheng vbc. 540 pûk a ni tawh a, pûk theih zat aṭangin 54.55% a tling.
Mizoram sorkar chuan loan hi May thlaah ṭum li, June-ah ṭum thum, July-ah ṭum ruk leh August thlaah ni 28 thlengin ṭum thum a pûk a, April thlaah pûk a ni lo. Ṭum khata a pûk tam ber ṭum, August 2, 2022 khan cheng vbc. 200 a pûk a ni.