PC Party president aṭangin Lalhmangaiha Sailo a châwl
Peoples' Conference (PC) party president Lalhmangaiha Sailo chuan an party-a a nihna a chawlhsan a, nimin khan senior vice president Vanlalruata hnenah PC party hruai hna a hlân.
Lalhmangaiha Sailo hian party hruaitu nihna a chawlhsan chungchangah nimin khan thuchah a tichhuak a; Pathian malsawmna dawnga sorkar hna ṭha tak a thawh hnuah ram siamṭhat a duh avangin politics a zawm tih sawiin, MPC party-ah kum 10 chhung president a ni a, MPC leh PRISM an inzawm hnua PC party an nih hnuah kum thum hmel hmu president a nih thu a sawi.
Political party-a a tel leh MLA inthlan chuha ram hruaitu nih tuma a beihnate chu Mizoram leh hnam tan a thiamna leh theihnate hmanga Mizoram hma sawnpui a duh vang a nih thu sawiin Lalhmangaiha chuan, "Ka pain ram hmasawnna tur a duante kha kan ramin a mamawh nia ka ngaih avangin tihhlawhtlin ngei ka duh tak meuh," a ti.
Lalhmangaiha Sailo chuan, "Kan ram leh hnam tana beih zel hi ka duhin ka la tum a, chutih laiin, kum upa lam ka lo ni ve ta reng mai a, hriselnate pawh a lo tlahniam ta. Ram leh hnam tana beihna, political party kaihhruai hna hi naupang zawk, la chak ṭha zawk leh tunlai mila ngaihtuahna hmang a, hna thawk thei kuta a awm ṭha ka ti a. Chuvang chuan, party president ka nihna hi chawlhsan a, ṭhangthar zawk kuta hlan ka tum ta a ni," a ti a; president mawhphurhna chu senior vice president Vanlalruata hnenah a hlân a ni.
PC President kal chhuak chuan, PC president mawhphurhna la tu Vanlalruata chu Brig. T Sailo hmathlirte tipuitling a, ram leh hnamin hma a sawnpui theih ngei ringin amah leh an chhungkuain an thlàwp zel dawn thu a tarlang a; Pathian leh a thawhpui te, thláwp leh puitute chungah te, inthlana a dina amah puitu leh vote-tu zawng zawng chungah lawmthu a sawi bawk.
Lalhmangaiha Sailo hian nimina a ina PC party elected office bearer ṭhutkhawmnaah president aṭanga a chawlh thu a puang a ni. PC party hruaitute chuan an party kal zel dan tur ngaihtuahin September 7, Nilaini-ah an ṭhukhawm dawn tih an tarlang.