Teachers' Day vawi 61-na lawm a ni

Nimin kha Teachers' Day vawi 61-na a ni a, sikul hrang hrangah zirlaite leh zirtirtute'n an lawm a, zirlaite'n an zirtirtute chawimawi nan thilpek an hlân. Zirtirtute Ni-ah hian chief minister Zoram­thanga chuan zirtirtute duhsakna a hlân a ni.

CM Zoramthanga chuan nimin khan social media kaltlangin Teachers' Day pualin zirtirtute zahna chibai bûkna thu a tichhuak a, "Zirtirtute hi ram innghahna la ni tur kan tu leh fate kaihruaitu pawimawh tak in ni. Syllabus-in zir tur a kham chin piah lamah zirlaite theihna inphûm hâi chhuahsak hna pawimawh tak thawktute in ni bawk. Zirtirtu hna hi a hluin a zahawm tak zet a ni. Mizoram tana in rawngbawlnaah ka duhsakna sang ber ka hlân a che u," a ti.

School Education minister Lalchhandama Ralte chuan Teachers' Day thuchah tichhuakin, duhsakna chibai a bûk a, "Zirtirtu hna hi a pawimawh em em a, nakin maia kan ram hruaitu la ni tur leh eizawnna kawng dap thei tura zirlaite kawng kawhhmuh a, nun kawng dik zirtirna hna ropui thawktu an ni," a ti a; chuvang chuan sorkarin zirtirtute pualin ni bik a siam thu a tarlang.

Lalchhandama Ralte chuan, Zirtirtute Ni pualin zirtirtu natna khirhkhân tuarte ṭanpuina tur thawhlawm lâk khawm ṭhin a nih thu sawiin, kuminah chuan sikul hrang hranga zirtirtute'n Rs 100 ṭheuh thawh tura tih a nih thu leh zirlaite erawh chu âwltir tur a nih thu a sawi a, "Thawhlawm tling khawmte hmang hian zirtirtu natna khirhkhân tuarte ṭanpui leh an ni ang," a ti.

School Education Minister tarlan danin, kuminah hian Teachers Day pualin zirtirtu leh an chhungte mi 53 hnenah ṭanpuina pek a ni dawn. Mizoram chhung damdawi-ina inenkawlte hnena ṭanpuina pek ṭhin Rs 10,000 chu a lêta tipungin, Rs 20,000 pek a ni dawn a, state pawn damdawi-ina inenkawlte hnena pek ṭhin Rs 15,000 pawh a lêta tipungin, Rs 30,000 pek a ni ang. Ṭanpuina pek tur hian sorkar sikul leh mimal sikulte pawh a huam vek a ni.

Zirtirtute'n zirlaite an zirtir danah ṭan lak lehzual a ngai tih sawiin Minister chuan, "Zirtir dan thar leh a ṭha zawnga zirtirnate kalpui a pawimawh hle. Zirnain hma a sawn theihna sorkarin theihtawp chhuahin sum pawh séng ṭhin mah se, zirtirtu ṭha tel lo chuan a hlawhtling thei lo. Mipui vantlang leh ram hmasawnna hi zirnaah a innghat a, a hnukpui leh innghahna laimu chu zirtirtute an ni," a ti.

Lalchhandama Ralte chuan, zirlai naupangte'n zirtirtute an entawn ṭhin tih sawiin, "Kan ram ṭhalai leh zirlaite hi ruih theih thil laka an fihlim theih nan zirtirtu zawng zawng ruih theih thil lakah inthiar fihlim turin ka chah a ni," a ti a; zirtirtu hna chu hna thianghlim a ni tih hriaa mahni invawng uluk tur te, an thiamna leh theihnate zirlaite tana hlan thar zel turtein zirtirtute a chah bawk.