AMC dan leh thupek zâwm turin ngen Complaint box-ah complaint 15 lut tawh

Aizawl Municipal Corporation (AMC) Enforcement Committee chuan, AMC hmalaknaa zualkona báwm an siamah complaint 15 a lut tawh tih tarlangin, Building Regulations leh AMC hnuaia dan leh thupek dangte ṭha taka zâwm turin mipui an ngen. AMC hian November 2021 aṭanga August 12, 2022 thleng khan in sak phalna 1,000 an pe.

AMC Enforcement Committee hian nimin khan AMC Auditorium-ah thuthar thehdarhtute an kâwm a; tarlan danin, AMC hian March 11-12, 2022 chhunga Board of Councillors ṭhut­khawmah Monitoring Committee leh Enforce­ment Committee an din a, May thlaa appointment pek an nih aṭangin AMC hnuaia hmalakna hrang hrangte bawhzuiin an endik a, AMC-ah rawtna an thlen ṭhin.

Enforcement Committee chairman John Zosangliana sawi danin, Committee hian rawtna/thurâwn ṭum hnih an thlen tawh a, chu'ngte chu thil chi hrang 15 a ni. AMC-in June 13, 2022-a complaint box an dah ṭanah complaint 15 a lut tawh a, chu'ng zinga 13 chu in sak kaihhnawih a ni. Rawtnate chu pawisa chawitir leh in sak ṭhiah tura rawt a ni tlangpui a; rawtna 15 zinga 13 chu AMC thuneitute'n an pawm a, pahnih chu zir chian leh turin an dah.

John Zosangliana chuan, in sak phalna pek leh in sak danah AMC, engineer te, local council-te leh mipuiin an tih tur an ti tâwk lo tláng nia a lan thu sawiin, "AMC-a mawhphurtu te, technical mi te, LC-te leh mipuite'n kan fate tan Aizawl nuam tak kan siam theihna turin kan dan neih sa hmang hian ṭan i la thar teh ang u," a ti.

In sak phalna pek a nihin, engineer-te'n drawing angin in sak bul an ṭanpui ang a, a tàwp thlengin mawh an phur tih sawiin Zosangliana chuan, "An kawhhmuh anga in neitute'n an ti duh lo a nih chuan AMC-ah an hriattir vat tur a ni," a ti a; LC pawhin drawing ang ni loa in sate chu stay order an pe thei a, mahse, ni sarih chhungin AMC-ah an hriattir tur a nih thu a sawi.

AMC Enforcement Committee vice chairman Rosiamngheta chuan, Building Regulations AMC dan leh thupek anga hmalakna court-a khing an awm thu sawiin, "AMC hi ama subject-ah dan anga hma an laknaah court-ah khin theih a ni lo. Tlema kan lo inchhu na deuh a nih pawhin dan anga kal duhna vang a ni," a ti.

Committee member Malsawmzuala Ralte chuan, an hnena complaint lut aṭangin in ṭhiah tura tih an nei tih sawiin, "Ṭhiat tawh an awm a, la ṭhiat lo pawh an awm. Dan angin khawng takin kal kan tum a, kan hmalaknaah chhungte leh ṭhian ṭha a awm thei lo," a ti a; complaint lutte chu a hmunah an endik ṭhin thu a sawi.

John Zosangliana chuan, Aizawl nuam zawk siam turin bul ṭan ṭhat an tum tih sawiin, "Mi tinin mawhphurhna kan nei. Tunah chuan vantlang hmun kan innêk siak a ni ber mai a, phalna pek ang ni loin an duh danin an sa leh mai ṭhin," a ti a; Aizawl nuam zawk siam a nih theih nan AMC dan leh thupekte ngai pawimawha zâwm turin mipui a ngen a ni.

Press conference telpuitu Aizawl deputy mayor R Thanglura chuan, Enforcement Committee-in hmalakna eng emaw zat an nei tawh tih sawiin, "Complaint box an siam a, complaint lutte chak taka bawhzui zel a ni. AMC hmalaknate a hmunah an endik ṭhin," a ti. Bawlhhlawh chungchangah chak zawkin hma an la tih sawiin, bawlhhlawh ṭawih thei leh ṭawih thei lote ṭha taka thliar turin mipui a ngen bawk.