Ram hruaitute'n Teachers Day hmanpui

Minister of state Lalruatkima chuan nimin khan St. Anthony’s Higher Secondary School-in Vanapa Hall-a Teachers’ Day an lawmna leh HSLC leh HSSLC-a hlawhtlingte chawimawina hun a hmanpui. Minister of state Robert Romawia Royte pawhin a bial chhung, Chhinga Veng Primary School I-ah Teachers' Day lawmna a hmanpui a; Teachers' Day pualin a bial chhunga sorkar sikul zawng zawngah MLA fund Rs 20,000 ṭheuh a pek thu a puang.

Vanapa Hall-a inkhawmah hian HSLC leh HSSLC-a letter hmu leh distinction-a pass-te hnenah chawimawina hlan a ni a; Nepali subject topper Subita Sharma hnenah lawmpuina Rs 30,000 hlan a nih bakah, HSLC/HSSLC-a top 10-a langte hnenah Rs 1,00,000 leh thuchei hlan a ni.

Minister Lalruatkima chuan, zirtirtute chu ṭhalaite rilru leh ngaihtuahna buatsaihtute an nih thu sawiin, "Kan ram hma hun siamtute an ni. Kan pian tirh aṭangin nu leh pate aṭangin zirtirna kan dawng ṭan a, chu chu kan chhungril ngaihtuahnaah intuhin kan nun a nghawng thui hle," a ti.

Zirtirtute pawimawhzia sawiin Lalruatkima chuan, "Zirtirtute'n zirlai bu leh nunphung zirlai pawimawh tak tak min zirtir a, kan rilru put hmang leh khua leh tui ṭha ni turin kawng min kawhhmuh ṭhin. Zirlaibu min zirtir mai bakah, kan harsatna min hriatpui a, a sutkian theih dan kawng min zawnpui a, nun kawnga harsatna awmte hmachhawn dan thlengin min zirtir," a ti a; zirlai hlawhtlingte chu a bul ṭanna chauh a ni tih hriaa kawng thui tak zawh tur an la neihah taimakna, tumruhna leh rinawmna nei tlat turin a chah.

Robert Romawia Royte chuan, zirtirtute chu hnam ro hlu, khawtlang leh mi tin tihmasawntu an nih thu sawiin, "An puala ní bik siam hi an phu a, he ní-ah hian zahna chibai kan bûk a ni," a ti a; Chhinga Veng PS-I chu kum 15 liam taa Aizawl East-II bialtu minister H Vanlalauva (L) hoa Chhinga Veng Education Plan siam zûlzuia English medium-a leh a nih thu leh, chutih laia sorkar leh veng mipuite'n inlungrual taka sikul leh hall ṭha tak an sak thu a sawi.

Minister hian Teachers' Day pualin Chhinga Veng PS-I hnenah infiamna hmanraw chi hrang hrang a pe a; zirlai 112 leh zirtirtu paruk an awm mek a ni.