Lawngtlai dist-ah ráltlân 5,909 awm mek

Lawngtlai District Committee on Myanmar Refugees chu an chairman Amol Srivastava, bawrhsap hoin nimin khan DC conference hall-ah an ṭhukhawm. Lawngtlai district-ah Myanmar ráltlân mi 5,909 an awm mek thu tarlan a ni.

Ṭhutkhawmah hian August 31, 2022 aṭanga Lawngtlai district ramri dep, Myanmar ram chhung Varang leh a chhehvela Myanmar sipai leh Arakan Army-te an inkah avangin Lawngtlai district-ah ráltlân an luh belh thu tarlan a ni a; ráltlan awm sate leh lut tharte dinhmun leh mamawh te, chhawmdawlna pek leh enkawl zui dan turte sawiho a ni.

Ráltlan lut tharte awm lailâwkna atana temporary shelter zâr nan taupauline pek ni se, an ti a; ráltlan chhawmdawlna atana state sorkara sum dil chu Home department-ah bawhzui an rél. An hriselna dinhmun enfiah chungchangah a ṭul leh mamawh dan azirin Doctors Without Borders-te nen thawkhoa hmalak ni se, an ti. District administration aṭangin blanket, commode, hygiene kit leh mamawh dangte pek an rél bawk.

Task Group on Myanmar Refugees Nodal Officer tarlan danin, chhinchhiah chinah Lawngtlai district-ah ráltlan mi 5,909 an awm mek a, chu'ng zinga mi 589 chu chawlhkar liam taa Myanmar army leh Arakan Army inkah vanga rawn lut thar an ni. Mi 5,320 chu tualchhung buaina vanga rawn lut leh lo awm tawh sa an ni.

Ráltlan rawn lut tharte chu Zochachhuahah mi 115, Hmawngbuchhuahah mi 210, Láitlangah mi 127 leh Dûmzautlangah mi 137 an awm a; community hall leh in remchanga an awm bakah, khawtual mite'n a ṭul angin an mikhual a ni.