KHAWTHLIR

Thisen pe
Aizawl West College NSS chuan nimin khan an college-ah thisen pek an huaihawt a, mipa 64 leh hmeichhia 13-te'n Civil Hospital, Aizawl tan thisen unit 77 an pe. PYD (NEI), Haulawng Section pawhin nimin khan Lamṭhuamthum UPC biak-inah Lunglei Civil Hospital tan thisen unit 80 an pe a, petute mipa 69 leh hmeichhia 11 an ni.

MPCC-in lawmpui
Congress party chuan thuchhuah siamin, August 27, 2022-a All India Football Federation (AIFF) inthlan ṭhatah Executive Committee member 14 thlan zingah Lalnghinglova Hmar, MFA honorary secretary a tel chu an lawmpui a, an chhuan thu an tarlang a, "Mizoram leh Mizo hnam tihmingṭhatuah kan ngai," tiin, duhsakna an hlân a ni.

Kuhva phal loh
Serchhip district bawrhsap Nazuk Kumar leh Kolasib bawrhsap John LT Sanga te chuan nimin khan thupek chhuahin, an district-ah dan loa kuhva lak luh leh phurh phal a nih loh thu an puang. Thupek zâwm lote chu IPC Section 188 hmanga hrem theih an nih thu an tarlang bawk.

Duhsakna hlân
MZP chuan thuchhuah siamin, September 5, Teacher's Day-ah thinlung takin zirtirtu zawng zawng duhsakna an hlan tih an tarlang a, "An hma hun kal zel turah Mizoram leh zirlaite tan ṭhahnemngai taka an thiamna leh theihna hlan zel turin kan duh a, malsawmna an dawn zel kan duhsak tak zet a ni," an ti. MZP hian Zirtirtute Ni pual hian Aizawla hmun hrang hrangah duhsakna thuziak an tár a ni.

Lunglei DMEO
State Election Commission chuan nimin khan Lunglei Municipal Council (LMC), 2022 inthlan neih turah Lunglei DC Kulothungan A chu District Municipal Election Officer & Appelate Authority atan a ruat. Thuneihna pek a nih chhung hian Lunglei DC chu Mizoram State Election Commission hnuaia deputation-a kal anga ngaih a nih tur thu a tarlang.