Ṭangrual pawlte'n 2018 inthlanah Sorkar siam theih ngei an beisei

Pawl pathum - Mizoram People Confe­rence (MPC), Zoram Nationalist Party (ZNP) leh Zoram Exodus Movement (ZEM) hruaitute chuan, pawl pathum ṭangrualin kum 2018 Assembly inthlan lo awm turah sorkarna an siam theih ngei an beisei thu an sawi.

Vanglaini palai zawhna chhangin ZEM Val Upa Council convener Rev. Dr K Than­zauva chuan, tun dinhmunah chuan kum 2018 inthlanah sorkarna an siam ngei a beisei thu a sawi a, "Kan movement kal zel danin thui tak a hrilh ang. Thil reng rengah hian movement a pawimawh a, pawl dangte nen pawh kan inhmuhkhawm leh ang a, kan movement hian hmalam a pan zel a ni," a ti.

Rev. Dr K Thanzauva chuan political party an thawhpui chungchangah, "Tun hma aṭangin kan political party system hi ṭha ka ti ngai lo. Tunah chuan an kalphung kan zir chiang zel dawn a ni," a ti a; political party-te nen harsatna awm loa an thawhho theih ngei a beisei thu a sawi.

ZNP president Lalduhoma chuan, sorkarna siam an inbeisei vanga intél khawm an nih thu Vanglaini a hrilh a, "Kum 30 liam ta chhungin party pahnih kaihhruaina hnuaiah kan awm a, kan paihthlak hnu kan thlang leh ṭhin. MNF leh Congress party-te hian SEDP leh NEDP-te an sawi a, hengte hi hmãna an tih theih loh leh tih duh loh hnu tho a ni. NEDP-te hi vote zawnna leh anmahni invulhna mai a ni," a ti.

Policy ngai reng Zoram mipuite'n an ning tih sawiin Lalduhoma chuan, "Zoram mipui hian damdawi thar pe tur an duh tawh. Chutiang pe thei tur chu mipuiin an zawng a, a hrang hranga awm loin kan inhlawm khawm a ni. Keimahni bakah hian Zoram siamṭhat duhtute an lo luh belh zel ang a, sorkarna kan siam ngei kan beisei," a ti a; political party-a awmna nei ṭhenkhat pawhin an thawhhona an thlawp tur thu a sawi.

ZNP President chuan, MPC leh ZEM-te nen an policy-ah inkalh a awm loh thu sawiin, "Kan policy-a a ṭha kan tih laite kan thur chhuak ang a, kan inpawmpui mai dawn a ni. Collective leadership-a kal zel kan duh a, sorkarna kan siam a nih pawhin páwn lam aṭanga kan kal dik lo tur min khalh ngiltu tur siam kan rilrûk a ni," a ti.

MPC vice president Vanlalhlana chuan Vanglaini palai zawhna chhangin, sorkarna siam ngei an inbeisei tih a sawi a, "Party ang chuan ZNP nen tun hmaa kan dinhmun kan pha tawh lo. ZEM hi chu party ang an ni lo. Mipuiin min thlawp kan beisei. Mizo mipuite hian ram tan leh kan sakhaw tana thawk tak tak tur an duh tawhin ka hria," a ti a; mipuite chu an chakna hnár tur an nih thu a sawi.

Vanlalhlana chuan, an thawhhonaah buaina a awm loh tur thu sawiin, "Ram tana thawk duh vek kan ni a, ram tana ṭha turah chuan kan inlungrual em em vek ang a, leader nihnaah pawh kan buai dawn lo a, ram siam kan dah hmasa ang. Chief Minister chu tu pawh ni se, harsatna kan nei lo ang," a ti.

MPC Vice President chuan PRISM nena an inkar zawhna chhangin, "Nikum aṭang tawh khan thawhhopui turin pawl hrang hrangte kan be tawh a, chung zingah chuan PRISM pawh hi an tel. Mahse, anni chuan thawhho thu puan hma an la ti a, nakkum velah puan an duh a ni," an ti a; ZNP leh ZEM-te nena an thawhhonaah hian PRISM pawh an tel ngei a beisei thu a sawi.

Pawl pathum ṭangrual - MPC, ZNP leh ZEM-te hian hruaitu leh seat insem dan turah thutlukna an la siam lo a, seat insem lo a, a bial a zira mi ṭha tur dah an rilrûk deuh a ni.