BME-ah mi 8,59,283 thun an ni tawh

Aadhaar card siamna tura biometric enrollment (BME) kalpui mek zelah Mizoram pumah August 8, 2017 thleng khan mi 8,59,283 thun luh an ni tawh.

Independence Day, Au­gust 15-a Lammuala hman­naa Chief Minister speech ziah saa tarlan danin, Mizorama biometric enrol­ment kalpui meka thun luh tawh mi 8,59,283-te chu Mizo­rama mihring cheng zat aṭanga chhûtin 73.50% a ni.

I-Day Chief Minister speech-a a lan danin, FCSCA department-in kumin fûr chhunga thing­tlang khaw kilkhawr zual 207-a chengte'n buhfai an nghei loh nan supply centre 46-ah May-September 2017 chhung tla tur buhfai an chhêk khâwl a ni a; National Food Security Act (NFSA) hnuaiah sorkar laipui aṭangin Mizoramin buhfai metric ton 5478.93 a dawng ṭhin a, NFSA-a tel lote tan thla tin buhfai quintal 70,000 lei ṭhin a ni.

Ram leilung leh boruak, sik leh sa venhimna turin State Action Plan on Climate Change (SAPCC) duan a ni tawh a; department pathum - Agriculture, UDPA, leh Environment, Forest and Climate Change-te'n sorkar laipuia MoEFCC-ah cheng nuai 1000 ruahmanna, Climate Change Project an thehlut tawh. Department pathum project thehluh zinga Agriculture depart­ment project, ‘Sustainable Agriculture Development Through Expansion, Enhancement & Modelling’ chu sorkar laipuiin a pawm tawh a, project hian district pali a huam dawn.

Cable TV network digi­tize hna kal mekah phase hnihna kalpui a ni tawh a, phase thumnaah khaw 23 tuam tur niin, phase lina­ah thingtlang khua zawng zawng tuam zawh hman tur a ni. Mizoramin e-service delivery outlet atan common service centre (CSC) 136 a nei a, e-service delivery atan thingtlang hmun hrang hrang­ah RIK 300 bun a ni tawh.

December 12, 1998-a hawn Lengpui Airport aṭang­in Guwahati, Kolkata, Delhi leh Mumbai-ahte direct flight a awm tawh a, Air India, Jet Airways leh Spice Jet-te an service mek. Indigo, Deccan Chartered Zoom Air leh IIC Techno­logies (Air Charter)-te'n Lengpui Airport-ah hian service turin dilna an thehlut tawh bawk.

Tourism lama eizawn­naah mi tam zawk an luh theih nan department hmun leh in ṭhenkhatte mimal kutah hlan a ni a, tourist hmun­hma 12 chu kum 10-15 chhung atan mimal hnenah hman hawhtir mek a ni. Kum 2016-17 chhungin Amobyu (New Maubawk), Saikao (Serkawr), Zyhno (Zawngling), Phura, New Laty (New Latawh), No-Aotla (Niawhtlang) leh Chakhei (Chakhang)-ahte tourist lodge hawn a ni a; cheng nuai 9907 sêngin Mamit-Aizawl inkarah Swadesh Darshan Scheme for Development of Eco-Adventure project kalpui mek a ni.

Mizoram pum huap leh khawtlanga hman tur Disaster Management Plan duan fel a ni a, Aizawl, Siaha leh Lawngtlai dis­trict-ahte Hazard Risk Vul­nerability Assessment tih zawh tawh a ni. Hunthar Venga lei tlahniam ṭhinna lai, Geological Survey of India, Shillong mithiamte'n an enfiah hnuah Mizoram sorkarin Detailed Project Report sorkar laipuia Natio­nal Disaster Management Authority hnenah an thehlut.