Citizenship Amandment Bill, 2016 Hnûkdâwk turin Duhoma'n a ngen

ZNP president Lalduhoma chuan Joint Parliamentary Committee (JPC) chairman Satyapal Singh, MP hnenah nimin khan ziakin ngenna a thlen a; Citizenship Amandment Bill, 2016 chu hnûkdâwk turin a ngen a, hnuhdawh a nih loh pawhin, Bill chu Mizoram huamtir lo turin a ngen.

Lalduhoma'n a ziah danin, Citizenship (Amendment) Bill, 2016 chu Lok Sabha-ah July 19, 2016-ah pharh a ni a, mahse, August 11, 2016-ah JPC ngaihtuah zui tura dah a ni. JPC chuan rawt duh neite tana rawtna thehluh theih turin hun a hawng a, mahse, hun hawn chhung chu a rei lo hle niin a ziak.

Citizenship (Amendment) Bill, 2016 chu sakhaw hrang hrangte nghawng a nih thu sawiin Duhoma chuan, ram lailia awm­te leh hmarchhak biala awmte awmna hmun azirin thil a dang­lam viau thei tih a sawi a, Mizoram leh hmarchhak mipuiin an hriat chian lehzual theih nan hun tam zawk hawn a ṭul thu a tarlang.

Bill siamṭhatna tura rawtna awm saah chuan Afghanistan, Bangladesh leh Pakistan aṭanga Hindu, Sikh, Buddhist, Jain, Parsi leh Kristian, India rama pem lutte chu India rama kum ruk an awm tawh chuan India khua leh tui nihna (citizenship) pek theih tih a nih thu sawiin, Lalduhoma chuan, "Myanmar-a Hindu leh Muslim te, China-a Uyghur Muslims te, Pakistan leh Bangledesh-a Ahmadhya Muslim-te telh an ni lo," a ti.

ZNP President chuan, Afghanistan, Pakistan leh Bangladesh rama aṭanga India rama pém lutte India khua leh tuia pawm chu mihring mihrinna

aṭangin awm viau mah se, Mizoram leh hmarchhak state danga chengte chimrala an awm theihna a nih theih avangin a ṭha lo hle tih a tarlang.

Mizoram dinhmun bik tarlangin Lalduhoma chuan, Mizoramah Chakma foreigner, Buddhist sakhaw zuitute dan loa an luh nasat thu a tarlang a, "Election Commission of India-in January 1950 hma lama India rama awm tawhte leh an thlahte Electoral Roll-ah thun phal mah se, kum 1950 hma lam aṭanga lo awm tawhte leh a hnu lama dan loa pem lutte thliar hran a harsa a ni," a ti. Bill chu pass a nih chuan, Mizoram tana harsatna nasa tak thlentu a nih theih thu a ziak a ni.

ZNP President hian a leh­khaah hian Mizorama Chakma pun dan a ziak tel a, chu chu a hnuaia mi hi a ni.

Chhiarpui Chakma Punna
Kum Awm zat %
1901 198
1911 302 152.52%
1921 680 225.16%
1931 836 122.94%
1941 5,088 608.61%
1951 15,297 300.64%
1961 19,327 126.34%
1971 22,392 115.85%
1981 39,905 178.21%
1991 80,000 200.47%
2001 1,50,000 vel