Mamit-ah UDPA pisa hawn a ni

Mamita Urban Development and Poverty Alleviation (UDPA) pisa sak thar chu nimin khan bialtu MLA John Rotluangliana, minister-in a hawng. In sak nan hian cheng nuai 9.6 hman a ni.

John Rotluangliana chuan, faina kawnga hmasawn leh zual theih nan leh, in leh lo dinna kawngah leh kawngpui fai zawk neih theihna atana Mamita UDPA pisa hawn a ni chu lawmawm a tih thu a sawi a, "UDPA department chuan mipuite in leh lo an din theihna atan bank loan a pûksak dawn a, chutah chuan mipuite pawhin tih tur kan nei ve a, a hmanna tur dik taka hmanga loan rûl ṭha turin kan inzirtir a pawimawh," a ti.

Mamit DC Lalbiaksangi chuan, an district-in an mamawh department an nei thar chu lawmawm a tih thu sawiin, "He department lo awm theihna tura hma min laksaktu sorkar chungah district aiawhin lawmthu ka sawi a ni," a ti a; Mamitah UDPA officer an neih loh avangin sorkar laipui aṭanga ṭanpuina an hmuh turah harsatna an tawh ṭhin thu a sawi.

Mamita UDPA department pisa hawnnaah hian sorkar department danga head of office, tlawmngai pawl leh khawtlang hruaitute an tel a ni.