MPCY-in CM thusawi mak an ti

MPC party ṭhalaite chuan thuchhuah siamin, tun hnaiah chief minister Lal Thanhawla'n Excise & Narcotic department-in ruih­hlo an mante an tihral dan a rinhlelh thu Zoram mipui hriata a au chhuahpui chu mak an tih thu an tarlang.

MPCY chuan, CM Lal Thanhawla thil sawi dan chu minister R Lalzirliana leh a department chan tihmualpho a tumzia a tihlannaa an ngaih thu an tarlang a, "Chief Minister leh Excise Minister inkarah inhmuhthiam lohna boruak lian tak a awm vanga dâwt leh thu belhchian dâwl lo hmanga inhrîkthlâk nana CM-in Excise department a hmang chiam hi kan dem tak zet. Congress chhungkua buaina hi department-ah ni loin, an party chhung­kuaah chingfel zawk tur­in kan chah a ni," an ti.

MPCY chuan, Excise & Narcotic department-in an ruihhlo man, an kuta awm tawh rinawm taka vawng a, dan ang thlapa an hâl ral ṭhin chu fakawm an tih thu an sawi a; Chief Minister chu minister pakhat a beihna hmanruaa department hmang lo tur leh Excise & Narcotic department-te rinawmna chu dâwta chantir tuma hnuaichhiah lo turin an chah a ni.