MR bill dan thar siam a ni

Mizoram sorkar chuan tun hnai khan notification tichhuakin, sorkar hnathawkte leh an chhungte damlo inenkawlna senso, medical reimbursement (MR) bill dan thar siam a nih thu a puang.

MR bill a san avangin Mizoram sorkar chuan MR bill dan zir chiang tur Committee a din a; Committee chuan an report sorkarah an thehlut a, report chu Cabinet meeting-in June 2017-ah a pawm. Report zûlzui chuan Mizoram sorkar chuan August 14, 2017 khan notification a tichhuak a, MR bill dan thar turte a tarlang a ni.

MR bill dan tharah chuan, damlote'n zinna atan a tláwm thei ang ber an hmang tur a ni a; thlawhtheihna chuan man chu Imphal, Guwahati leh Kolkata zinna atan Rs. 10,000 aia tam lo leh, Delhi, Mumbai, Chennai, Bengaluru, Hyderbad leh Thiruvananthapuram kalna atan Rs. 20,000 aia tam lo tur a ni. Senso hian kal leh hawl lam a huam.

Ei leh in atan ni khatah Rs. 150 aia tam lo bill theih a ni dawn a, special diet mamawhte tan ni khatah Rs. 350 aia tam lo bill theih a ni ang. Bithliah zat aia tam ei leh ina hmang an awm chuan anmahni suma pek tur a ni.

Thlennaa zan riah man bill theih zat chu grade pay aṭanga chhût a ni thung. Bill sang thei ber, grade pay 8,700 leh a chung lamte'n zan khat riah manah Rs. 2,000 aia tam lo an bill thei dawn a; a bill thei hniam ber, grade pay 1,800 hnuai lamte'n Rs. 200 aia tam lo an bill thei dawn.

Zan riah man bill theih chin bituk dangte chu - garde pay 5,400 - 8,700 tan Rs. 1,000; grade pay 4,400 - 5,400 tan Rs. 700, grade pay 4,200 - 4,400 tan Rs. 500 leh, grade pay 1,800 - 4,200 tan Rs. 300 a ni. Bill theih zat hi state páwna refer-te tan a let zelin a pung ang.

MR bill dan thar ruahman a nih tâk avang hian sorkar hnathawkte chu family declaration ti ṭha leh vek tura tih an ni. Head of office-te chu an hnuaia mite'n an chhungkaw member-a an ziahte chu uluk taka enfiah a, a rintlak ngei a ni tih finfiah tura tih an ni. A hnua dik lo hmuh chhuah a nih chuan head of office-te'n mawh an phur ang a, an chungah action lak a ni dawn.

Vanglaini palai zawhna chhangin Finance minister Lalsawta chuan, sorkar hnathawkte MR bill a tlem theih deuh dan tur sorkarin a ngaihtuah tih a lo sawi tawh a, "Damlote'n an tawrh phah chuang si loa siamṭhat dan ngaihtuah tur committee din a ni," a ti a; MR bill kalphung siamṭhat ni mah se, sum renchem vanga damlote'n an tawrh chu sorkarin a duh chuang lo tih a sawi.

Mizoram sorkar chuan sorkar kum kal ta chhung khan medical reimbursement atan hian cheng vbc. 78.09 chuang a séng a, sorkar kum kal mekah hian MR bill atan hian budget-ah cheng vbc. 98.51 dah a ni.