NHM-a thawkte'n hlawh la lo rei

National Health Mission (NHM) hnuaia thawkte'n thla nga vel hlawh an la tawh lo a, ni tin khawsaknaah harsatna an tâwk nia thu dawn a ni.

NHM mission director Dr Lalro­zama chuan, sorkar laipui aṭangin sum an hmuh mai loh avangin thawktute hlawh pek mai theih a ni lo niin a sawi a; chutih rualin, tun hnaiah sorkar laipuiin cheng nuai 600 vel a rawn pek avangin, thawktute hlawh chu May 2017 thla thleng pek theih a ni dawn niin a sawi.

Dr Lalrozama chuan, sorkar laipuiin sum a rawn pek tlai chhan chu, Mizoram sorkarin sum a tum ve tur (state matching share) a huna a pek theih loh vang nia sawiin, chumi vanga harsatna thleng ṭhin chu chinfel chhoh zel a nih thu a sawi bawk.

NHM Mission Director sawi danin, sorkar kum liam ta, 2016-17 chhung khan Mizoram sorkar tum ve tur an dil chu cheng nuai 900 vel a ni a, chuta ṭang chuan cheng nuai 633 an hmu tawh a, cheng nuai 311 an dil leh mek. Mizoram sorkara sum an dil mek chu an hmuh theih chuan sorkar kum kal meka hna thawhna tur sum pawh sorkar laipuiin a rawn pe dawn a; NHM hnuaiah programme 30 chuang bawhzui mek a ni.