Kuminah proton vuah 23 man tawh
Aizawl City Traffic Police chuan kumin chhungin two wheeler silencer-a a ri ring chi (proton) vuah 23 an man tawh a, bike neitute chu pawisa an chawitir ṭhin.
Traffic SP C Lalthanmawia'n Vanglaini palai zawhna chhanga a sawi danin, traffic police-te hian kumin chhungin two wheeler-a proton vuah 23 an man tawh bakah, kum 2016 khan 100 an man a, kum 2015 khan 145 an man bawk.
Traffic SP chuan, proton vuah an mante chu an thlawnsak a, Traffic Control Room-ah an dah tih a sawi a; proton vuahtute chu vawi khat manna aṭangin pawisa, Rs. 1,000 an chawitir nghal ṭhin tih a sawi bawk.
Thu dawn danin, two wheeler eng chi pawh, silencer original emaw, tihdanglam leh proton vuah emaw pawh ni se, ri rin zawng tehnaa decibel 80 chung lam phal a ni lo a, decibel 80 chung lam chu man theih a ni. Bullet bike-te chu company siam ang silencer chu a ring vak lo, mahse, free flow exhaust vuah an awm fo tih an sawi.