NIAS-a Inquiry Commission report MNF-in an pawm loh thu an puang

MNF vice president leh an Vigilance Committee-a chairman R Tlanghmingthanga chuan, Labour, Employment and Industrial Training (LEIT) minister Lalrinmawia Ralte leh Mizoram Youth Commission (MYC) chairman T Sangkunga te NIAS, Kolkata-a zirlai 32 tirhnaah an inhnamhnawih ngeia an ngaih thu a sawi a; NIAS chungchagna Inquiry Commission thil chhui dan chu an pawm loh thu a puang.

R Tlanghmingthanga hian nimin khan Aizawl Press Club-ah thurthar thehdarhtute kâwmin, Nalanda Institute of Advance Studies (NIAS), Kolkata chungchanga sorkar hmalak dan leh Inquiry Commi­ssion report-a an ngaihdante a sawi.

MNF Vice President sawi danin, NIAS-a zirlai 32 tirh leh Mizo­ram Building and Other Construc­tion Workers Welfare Board (MBOCWWB) chungchanga thil dik lo awm nia sawi chhui turin chief minister Lal Thanhawla nuphal K Lalchhunga ruat a ni a, mahse, dodal­na a awm vang nia ngaih theihin a chhui thâwm hriat zui a ni lo.

Chumi hnu, April 20, 2017-ah a chhui turin LEIT department secretary Benjamina leh Neeraj Thakur, IPS ruat an ni a; May 20-a report thehlut hman tura tih an ni. Hun tiama an chhui zawh hman loh avangin June 28, 2017 thleng hun pek belh an ni a, July 4-ah report chu sorkarah an thehlut a ni.

R Tlanghmingthanga chuan, Inquiry Commission member atana LEIT Secretary ruat a ni chu, sorkarin thu dik hmuh chhuah tak tak a tum loa an ngaih thu a sawi a, "Tu thua zirna in lem NIAS nena MoU ziak nge an nih? Kum thum zir tur ni si, eng vanga kum khat atan chauh MoU an ziah, Welfare Board sum nuai 500 chuang hi tu thua dan kalha hmang nge an nih, NIAS hnena cheng nuai 128 hi tu thua ni 43 chhung lek a pe tla nge an nih, tihte chhui tura kan ngaih laiin, zir tur thlannaah Lalrinmawia Ralte leh T Sangkunga te an inrawlh leh rawlh loh chhui tura an ti hi 'Tlawng vuaka Mat dap ang' a ni a, a buk ṭhelhin an ṭhelh lui a ni," a ti.

MYC chairman ṭhin T Sang­kunga chu NIAS chungchangah a inrawlh ngeia an ngaih thu sawiin Tlanghmingthanga chuan, "NIAS hmelhriat hmasatu a ni a, NIAS-in Tlangnuam, Aizawla call centre an hawnnaah pawh khuallian a ni," a ti a; MYC chairman a nih laia motor a kawl, Renault Duster MZ-01 M-9898, cheng nuai 12 chuanga lei, 'Chairman, MYC' tih tàrna ṭhin chu tun thlengin ama ta ang maiin a la kawl nia sawiin, tun thlenga a kawl chhan puang vat turin an phût tih a sawi.

LEIT minister hlui Lalrinmawia Ralte pawh NIAS-ah a inrawlh ngeia an ngaih thu sawiin MNF Vice President chuan, "NIAS-a zirlai 32-te hi Welfare Board sum hmanga tirh an ni a, khatih laia Board chairman chu Lalrinmawia Ralte a ni. Ani chair-na Board meeting-in NIAS-a sum hman tur Rs. 1,28,19,200, Board sum aṭanga pek tura thutlukna hi a siam a ni," a ti.

R Tlanghmingthanga sawi danin, MBOCWWB sum, Emporium Training & Consultancy, Kolkata-a zirlai tirh nana nuai 259.57 hman te, Best First Step Quality Skill Training, Guwahati-a zirlai tirhna senso nuai 73.98 leh, Board sum nuai 50 chuang sorkar hnathawkte hnena pûktirte chu Lalrinmawia Ralte kaihhruaina hnuaia thutlukna siam vek a ni a; minister a nih lai, September 9, 2014-ah NIAS chu a hmunah a tlawh a ni.