KHAWTHLIR

CYMA puihna pe
Rochungnunga s/o Robert Liantluanga (L), P&Sons, Dawrpui chuan Central YMA-in a ṭulna apianga a hman turin nimin khan CYMA-ah Rs. 10,00,000 a pe. Sum inhlanna hi CYMA pisaah neih a ni a, CYMA president Lalbiakzuala'n kaihruaiin, CYMA aiawhin general secretary Lalhmachhuana’n a dawng a ni.

Thisen pe
JC Security Guard and Labour Supply Agency chuan nimin khan Synod Hospital-ah blood donation camp an buatsaih a, mipa 15 leh hmeichhia pakhatin thisen unit 16 an pe.

Meizial man
Lungleia Legal Metrology enforcement-te leh Anti Tobacco Squad-te chuan nimin khan Lungleia dawr eng emaw zat aṭangin ram dang meizial dan loa zawrh báwm 89 an man.

RSBY zirtir
Nimin khan Lawngtlai CMO conference hall-ah Lawngtlai district-a damdawi-in, CHC leh PHC-a community health officer, medical officer, health supervisor leh health worker-te tan RSBY-a tel turte hming lakkhawm dan tur inzirtirna buatsaih a ni. RSBY kaltlang hian damlote'n kum khatah Rs. 30,000 thleng an hmang thei a ni.

Police chawimawi
Champhai District Executive Force-a sub-inspector Jerry Lalduhawma Poonte chu khehpuam (pseudoephedrine) mûm 12,48,000, Rs. 1,84,32,000 hû man kawnga a thawh hlâwk avangin nimin khan DGP Thianghlima Pachuau-in chawimawina, 'Good Service Mark' a hlan.