Sorkarin grape wine a mante Pêk lêt/lêt loh tur la chiang lo ; Grape wine-ah chhiah lâk a ni dawn

Excise & Narcotics department (END) minister Dr K Beichhua chuan nimina Assembly session-ah, May 27, 2022-a Millennium Centre aṭanga grape wine mante chu tih zui dan tur ngaihtuah a la nih tur thu a sawi. Hetih lai hian, dan anga grape wine siam a nih hunah sorkarin chhiah (tax) a la dawn.

ZPM member C Lalsawivunga'n sorkarin grape wine a mansak leh a neitute Rs 3,000 a chawitir pek lêt a nih dawn leh dawn loh a zawhna chhangin END Minister chuan, Grape Wine Rules tihfel a nih hnuah grape wine an mante chu tih dan tur ngaihtuah a la nih dawn thu a sawi a, "Rs 3,000 chawitir chu Mizoram (Liquor Prohibition) Act anga tih a ni," a ti.

Millennium Centre aṭangin zu man tel a nih leh nih loh zawhna chhangin Dr K Beichhua chuan, "May 27, 2022 khan grape wine ni lo man an nei nual a ni," a ti a, Dragon beer, Soju dark wine leh beer-te man tel a nih thu a sawi.

END Minister chuan, Grape Wine Rules chu Council of Minister-in an pawm tawh thu sawiin, "Law department-ah vet turin kaltir mek a ni a, chumi hnuah notification chhuahin, hman theih turin gazetted-ah chhuah a ni ang," a ti.

Political party dangin grape wine siam ṭha an tih leh tih loh zawhna chhángin Dr K Beichhua chuan, "Grape grower-te'n party pathum - Congress, BJP leh ZPM aṭangin wine siam ṭha an tihna an la thlap a ni," a ti a; dan anga grape wine siam chhuah a nih hunah chhiah lâk a nih tur thu a sawi.

END Minister sawi danin, Grape Wine Rules-ah chuan ram chhunga thar chhuah hmang chauhin grape wine siam phal a nih dawn avangin, hmun dang aṭanga wine siamna atan grape lak luh phal a ni dawn lo a ni.