Assembly session ṭan a ni

Ni thum chhung awh tur, 8th Mizoram Legislative Assembly ṭhutkhawm vawi 10-na chu nimin khan ṭan a ni a, Mizorama a ṭum khatna atan paper hmang vek loin, digital system-a kalpui a ni.

Assembly speaker Lalrinliana Sailo chuan, digital hmanga session kalpuina atan Ministry of Parliamentary Affairs aṭangin cheng vbc. 8.70 hmuh a nih thu a sawi a, "Sum hi 90:10 tur a ni a, rang takin state-in a tum ve tur chu Chief Minister-in min pe chhuak a, kan lawm hle," a ti.

Lalrinliana Sailo chuan, paper hmang miah loa session kalpui chu an la tih theih loh thu sawiin, "Theihtawp chhuahin hma kan la zel ang. Tun ṭumah chuan less paper-a kalpui phawt a ni ang," a ti a, member-te tan paper pangngai la hman theih a nih thu a sawi.

Nimina Assembly session-ah hian Home leh Taxation changtu Lalchamliana'n 'The Mizoram Private Security Agencies Rules, 2022' leh 'Notification issued under the Mizram Good and Services Tax, 2017 (wef. 21.3.2022 - 5.8.2022) a pharh.

Power & Electricity minister R Lalzirliana'n JERC for the State of Manipur and Mizoram Annual Report 2018-19, 2019-20, 2020-21-te a pharh bawk.