VC/LC 34-ah by-election neih a ni

Mizoram State Election Commission (SEC) ruahman angin nimin khan Mizoram hmun hrang hrangah village/local council by-election neih a ni a, tluang takin vote thlâk a ni. Keifang Venglai VC by-election neih tur erawh ṭhulh a ni thung.

VC/LC by-election neih tur chungchangah hian SEC chuan August 11, 2022 khan hriattirna a lo chhuah tawh a; chumi ang chuan nimin khan tluang takin by-election neih a ni a, nizan khan vote tlate chhiar nghal niin, result kan hre hman lo.

VC by-election neih­nate chu district coun­cil huam chhung ni loah chuan district pariat - Aizawl, Lunglei, Serchhip, Champhai, Mamit, Kolasib, Saitual leh Khawzawl district-ahte a ni a; VC 18-ah by-election neih tura tih ni mah se, VC 17-ah inthlan niin, Keifang Venglai VC-ah erawh inthlan ṭhulh a ni thung.

MADC huam chhung, Siaha district-a V/C pariatah by-election neih a ni a; LADC huam chhung, Lawngtlai dis­trict-ah chuan V/C panga­ah inthlan a ni.

Aizawl Municipal Corporation huam chhunga veng/ local coun­cil pali-ah by-elec­tion neih a ni bawk.

VC/LC by-election-a vote tlate chu nimin tlai/zan khan chhiar nghal a ni a, he thu ziah lai thleng hian result hriat a la ni lo. By-election result puan hnua executive body din hun hnuhnung chu September 9, 2022 a ni.

Hetih lai hian, inthlan vote thlâk hma ní, September 5, 2022 khan SEC chuan hriattirna tichhuakin, September 6-a Keifang Venglai VC by-electon neih tur chu ṭhulh a nih thu a puang. Ṭhulh a nih chhan chu, Gauhati High Court, Aizawl Bench thupek vang a nih thu tarlan a ni.

Keifang Venglai VC by-election neih a ngaih chhan chu, LAD-in May 2, 2022-ah VC a ṭhiah vang a ni a; VC ṭhiah chhan chu, National Highway no. 06 zauhnaa zangnadawmna chungchangah VC-te'n dik lo taka thil an tia hriat a nih vang a ni.