Solar town atan Saitual puan a ni

Power & Electricity minister R Lalzirliana chuan ZPM member C Lalsawivunga zawhna chhangin, Mizoram district khawpui zingah solar town/solar city atan Saitual puan a nih tawh thu nimin khan Assembly session-ah a sawi.

C Lalsawivunga chuan, kum 2018 inthlan dawna MNF election manifesto-ah district zawng zawng solar town/solar city atan puan a nih tur thu tarlan a nih thu sawiin, "Solar town/solar city-ah district dang puan tum ve a ni em? Election manifesto angin tih tur a ni em? Ngaihtuahna (dream) a ni em, eng nge puan an nih loh chhan," tiin a zawh belh.

PE minister R Lalzirliana chuan, Ministry of New and Renewable Energy (MNRE) chuan district tina solar city puang turin state-te a tih thu sawiin, "Mahse, sum eng mah min rawn pe chuang lo. Tunah hian MNRE hnenah an thu anga puan a nih angin, a enkawl zuina tur sum min pe turin kan dil a ni," a ti a, district tin solar city/solar town-a puan chu a harsat deuh tur thu a sawi.

Zawhna kal zelah MNF member Lalrinsanga Ralte chuan, Assam leh Mizoram ramri Buarchep leh Aitlangah kawlphetha pawh luh vek tawh a nih thu leh Vairengteah PE department SDO dah thar a nih thu a sawi a ni.