CM-in DVBP rem tihna la hmasa loa motor lei chhan sawifiah ; Lirthei hmasa kawng chhoah nam a ngai; a kal thei ngang lo - CM

General Administration department (GAD) changtu chief minister Zoramthanga chuan ZPM Legislature Party (ZLP) leader Lalduhoma zawhna chhángin, tun hnaia Chief Minister hman atana Jeep Compass lei a nih chhan a sawifiah a; lei rawttu chu amah a nih thu leh a lirthei kawl chu a kal thei ngang tawh lo a, kawng chhoah nam a ngaih ṭhin thu a sawi.

CM Zoramthanga chuan, kum 2019-ah minister-te hman tur Hyundai Verna car 11 leh Scorpio 11 lei a nih thu sawiin, "Motor zawng zawng hi cheng nuai 316.36 man a ni. Kum 2019-ah vêk CM support car atan hman turin Jeep Compass pakhat lei a ni a, Rs 25,56,000 man a ni. Tun hnaiah CM support car atan Jeep Compass lei leh a ni a, Rs 24,23,901 man a ni," a ti.

Tun hnaia Jeep Compass leina man chu pek lâwk a nih thu sawiin Zoramthanga chuan, "GAD (SAW) budget head aṭanga lei tura hmalak mek a ni. Department Vehicle Purchase Board (DVPB) remtihna lâk hmaa lei tih hi a dik e. Mamawhna bik leh ṭul bik thil avanga lei lâwk a ni," a ti a, DVPB-in a pawmpui tawh thu a sawi.

Lalduhoma leh Congress Legislature Party leader Zodin­tluanga zawh belhna chhangin Chief Minister chuan, "Sorkar hlimah minister-te hman tur motor a ṭha tawk lo viau a, an car tur leh support car tur lei a ni. Chief Minister chuan a hlui eng emaw chen a hmang a, a hnuah tihngaihna a awm ngang lo a, kawng chhoah nawr a ngai a ni," a ti.

Zoramthanga chuan, CM support car pakhat hman theih a nih tâk loh avangin Jeep Compass lei a nih thu sawiin, "Chumi hnuah support car dang zawk a kal hleih theih ngang lo avangin a dang lei leh mai rawtna a awm avangin lei leh a ni," a ti a; Jeep Compass chu an zawngchhang avangin CM support car atan lei leh a nih thu a sawi.

Motor lei a hmanhmawhthlak chhan chu, support car pakhat zawk a kal theih ngang loh vang nia sawiin Chief Minister, "Pawisa pawh office-a a remchang ang dapin kan ti ta chûk chûk a ni," a ti.

Chief Minister hman tur motor Jeep Compass lei thar registration number chu MZ-01 X-7733 a ni tih RTI Act hmanga zawhna chhannaah tarlan tawh a ni.