Hmun pakuaah police camping khâr a ni

Mizoram Police-in police mi leh sa, ruih theih thila buaite tana hmun hrang hranga Detoxification & Rehabilitation Camping an buatsaih chu zawh a ni a, September 5 khan hmun pakuaah khârna hun hman a ni. He camping hi police-te'n rilru leh taksaah an hlâwkpui thu Police thuchhuah chuan a tarlang.

Detoxification & Rehabilitation Camping hi National Fund for Control of Drug Abuse (NFCDA) aṭanga sum hmuh hmanga buatsaih a ni a, ni 45 chhung awh niin, police mi leh sa 346 an lût a ni.

Camping neihna hmun pakua - battalion headquarters pariat leh Police Training School, Thenzawlah khârna inkhawm hman a ni a, police hotu lute'n an hmanpui. DGP Devesh Chandra Srivastva-in 3rd MAP-ah, IGP John Neihlaia'n 1st MAP-ah, IGP Parwaiz Ahmed-in PTS-ah, DIG Lalbiakthanga Khiangte-in 5th IR, Lungverhah, DIG Neichungnunga'n 1st IR, Mualvumah, DIG LR Dingliana'n 4th IR, Luangpawlah, DIG Thomas Zodingliana'n 2nd IR, Khawzawlah leh DIG Lallianmawia'n 2nd MAP, Lungleiah an hmanpui a ni.

Police thuchhuah chuan, camping ni 45 chhungin awmze nei takin taksa insâwizawi te, rilru hriselna chungchanga inzirtirnate leh thlarau nun lama inkaihhruainate tih a nih thu a tarlang a, "Camper-te'n hmuh theihin taksa leh rilru lamah nasa takin an hlâwkpui a, zu leh ruihhlo an tih ṭhinte thlah thei turin rilru leh taksaah an chak phahin hma an sawn phah hlea hriat a ni," a ti.

Police-te'n hna harsa leh hautak hmachhawn a ngaih cháng a awm a, hmun harsa leh hrehawm tak taka awm a ṭul chángte awm tih tarlangin thuchhuah chuan, "Chhungte leh nupui fanaute hmuh phak loha rei tak tak kal chhuah a tam avangin leh sual hmachhawnna leh dan leh hrai kenkawh thilah chhum lo chat loa rilru leh taksa a hah ṭhin avangtein rilru hriselna kawngah nasa takin nghawng a nei thei a. Rilru lama harsatna chhâwk turin kan mi leh sate'n zu leh ruihhlo an tih phah nasa nia hriat a ni," a ti a; uluk taka inngaihven a ṭul thu a tarlang.

Police thuchhuah chuan, camping neihna tura thâ thawhtu zawng zawngte leh hun hmanpuitu resource person-te chungah an lawm thu an tarlang a; camping-a lutte leh an chhungte chungah lawmthu sawiin, "He camping hian police mi leh sa eng emaw zat ruihhloin a tihbuaina lakah a ṭha zawngin kawngro thui tak a sut a, rah ṭha a chhuah ngei kan beisei a ni," a ti bawk.