KHAWTHLIR

Hlawh pe chhuak
Mizoram sorkar chuan sorkar hnathawk nghet, group C leh D-te August 2022 thla hlawh tur chu nimin aṭang khan a pe chhuak. Group A leh B-te hlawh pek chhuah hun tur erawh sawi theih a la ni lo a, Finance department chuan pek chhuah theih thuai an beisei a ni.

A taka kalpui hun tur hriat loh
Rural Development minister Lalruatkima chuan INC member Nihar Kanti Chakma zawhna chhangin, Tlabung RD block a taka kaltir turin sorkarin hma a lak mek thu a sawi a, tun dinhmunah chuan a nih dan tur anga a kal hun tur sawi theih a nih loh thu House a hrilh.

VC member zirtir
Mizoram State Institute of Rural Development & Panchayati Raj chuan Lawngtlai district-a khaw 13-a VC member-te tan nimin khan Lawngtlai BNRGSK Hall-ah tuia hnianghnâr leh intodelh khua ni tura khawtlang tih tur leh mawhphurhna inzirtirna an buatsaih. Training hi vawiinah chhunzawm tur a ni a, naktukah zawh a ni ang.

Sorkarin tha a ti
September 20, 2021-a Sports Ministers' Conference online-a neihah Mizoram Sports Minister-in sports chu Indian Constitution-a state list aṭangin concurrent list-a dah a rawt nia social media-a tarlan chu GAD changtu chief minister Zoramthanga chuan sorkarin a hriatpui thu a sawi a, "Sorkarin ṭha a ti," a ti. Hemi chungchangah hian ZPM member Lalduhoma'n Mizoram sorkarin a hriatpui leh hriatpui loh leh, sorkar ngaihdan a zawt a ni.

Thuamthat Tum rih lo
MNF member Dr ZR Thiamsanga zawhna chhangin Agriculture minister C Lalrinsanga chuan, New Champhaia Agriculture dept. kudam chu a sakna a rei deuh tawh thu tarlangin, "A building hi thuamṬha tur chuan a hautak deuh tawh avangin tun dinhmunah chuan thuamṭhat tumna a awm rih lo," a ti.