Nuai 113.93 tihchingpen chhui turin Lokayukta-in ACB a ruat

ZPM Ṭhalai chuan, Congress in kum 2017 báwr vela cheng nuai 113.93 tihchingpen nia lang chhui tura Lokayukta an ngenna chu bawhzui a ni a, Lokayukta chuan chhui turin Anti Corruption Bureau (ACB) a ruat, niin an tarlang.

Hemi chungchangah hian ZPM Ṭhalai chuan thuchhuah siamin, Congress sorkar lai, March 2017 vel khan Ministry of DoNER aṭanga sum rawn kal, sorkar hnathawkte hnena computer training tihna turah hming lem 1,300 zet a awm tih hmuh chhuah a nih thu leh, hming lem training-na senso cheng nuai 113.92 a chingpen thu an tarlang.

ZPM ṭhalaite chuan, thil dik lo titute hrem an nih theih nan April 5, 2022 khan Lokayukta-ah complaint an lo thehlut tih sawiin, "Congress sorkar hnuaia eirûkna lian tham takah hian a mawh latute an insawifiah zawh loh avangin a chhui hna thawk turin Lokayukta chuan August 17, 2022 khan ACB a ruat a ni," an ti.

Congress party chu an sorkar laiin an sapatàl a, sûlhnu pawr tak nei ṭhin leh opposition-a an awm apianga piangthar dera mipui hnena ngaihdam díl leh chiam ṭhin an ni tih sawiin ZPM Ṭhalai chuan, "Mipuite'n Congress party-ah rinna an nghat ngam tawh lo a, Congress party chu opposition-a an awm hian ṭhat loh theih lohna báwmah an awm a ni mai," an ti bawk.