MoS Chakma bàn Aug. 25. thleng nghak ; NGO-All Party-in Citizen bill dodal dawn

NGO Coordination Committee (Joint NGO) hruaitute nimina Central YMA committee room-a ṭhukhawm chuan, minister of state Dr Buddha Dhan Chakma bàn tura Chief Minister an phût chungchangah August 25, 2017 thleng nghah an rel.

Meeting zawha Joint NGO thuchhuah chuan, "Dr BD Chakma, minister of state aṭanga bàn tura Chief Minister hnena ngenna July 27, 2017-a thehluh tawh chu hmalakna engmah a awm rih loh avangin August 25, 2017 thleng ngaihchan ni se kan ti a. August 25 thlenga sorkarin hmalakna a nei lo a nih chuan hmalak zel dan tur ngaihtuahin August 26, 2017 khian inkoh khawm leh ni se; a ṭul dan azirin ram pumah kawngzawh leh total bandh huaihawt ni se," a ti.

Joint NGO meeting-ah hian Central YMA, MUP, MHIP, MZP leh MSU hruaitute an tel a ni.

Nimin vek khan Joint NGO hruaitute leh Mizorama political party hruaitute chu CYMA committee room-ah an ṭhukhawm a; kum 2018-a Assembly inthlanah candidate atana Chakma dah leh dah loh chungchangah political party-te chu September 15, 2017 hmaa ngaihdan mumal tak nei turin an beisei.

Joint NGO kaihhruai meeting thuchhuah chuan, "Kum 2018 MLA General Election-a Chakma candidate siam loh chungchang a ngaihtuah a, zau taka sawiho a nih hnuah, party tinin anmahni party ṭheuhah hemi chungchang hi lo sawihoin, an party ngaihdan mumal tak September 15, 2017 aia tlai loa siam turin beisei an ni," a ti.

Meeting-ah hian Parliament-a pass tuma buaipui mek, Citizen Amendment Bill, 2016 chungchang an ngaihtuah a; "Joint Meeting on the Citizenship (Amendment) Bill, 2016 Chairman hnenah, all NGO leh all Political Party Joint Meeting chuan Bill kan duh lohna leh ṭha kan tih lohna thlen ni se kan ti," an ti a; Committee hotute pawh Mizoram rawn tlawh ve tura ngen ni se, a ṭul angin Delhi-ah pawh aiawh intirh ni se kan ti," an ti bawk.

Meeting-ah hian Central YMA, MUP, MHIP, MZP leh MSU hruaitute an tel a; political party aṭangin an beisei ang zat, mi pathum ṭheuh an tel a, BJP, Mizoram Pradesh aiawh an tel lo thung.