MPF hruaitute zingah Congress tana Ṭha lo tura campaign an awm - Hawla

Congress party president Lal Thanhawla, chief minister chuan, Mizoram People Forum (MPF) hruaitute zingah Congress party tana ṭha lo tur záwnga campaign duh an awm niin a sawi.

Lal Thanhawla hian nimin khan Congress Bhavan-ah thu sawiin, "MPF hi inthlanna felfai leh thianghlim a awm theihna atana din ni si, an hruaitute zingah Congress tana ṭha lo zawnga campaign duh an awm. An lehkha min sign tirte kha an theihnghilh ta em ni," a ti.

MPF-in 'door to door campaign' an khap lo tih sawiin MPCC Presi­dent chuan, "Inthlanna thianghlim leh felfai kalpui an tum emaw kan tih laiin, door to door campaign an khap lo hi a mak hle," a ti a; door to door campaign chu thil dik lo tihna awlsam bera a ngaih thu a sawi.

Lal Thanhawla chuan, eptute'n a kaihhruai sorkar beihna tur an hriat loh thu sawiin, "Kan ṭawng sual an châng ringawt a, kan sawi lohte min sawitir. Min beihna tur dang an hre lo hi a lawmawm. Min beitute ka fakna chu, an zah tuarchhel hi a ni, thubuai an neih pawhin an zak chuang lo," a ti.

MPCC President chuan, an sorkar loh chhungin hmathlir nei lo an sorkar nia sawiin, "Hei vang hian kan hnungtawlh leh ṭhin. Kih hnawk thian chungin kan kal a, kih hnawk thian chung chuan kal chak a har hle," a ti a; kih hnawk then tur awm lo se chuan Mizoram chu dinhmun sáng taka a awm tawh tur thu a sawi.

MNF-te'n minister hlui Lalrin­mawia Ralte leh MYC chairman hlui T Sangkunga te chhuina an awih loh chungchangah Lal Than­hawla chuan, "Zalen taka chhui an nih theihna atan, dâwtin puh mahse an báng ngam a, fak zawk tur an ni. Health care sum chiahpuam a, hospital building pum tibotute hian an sawi ngam tur a ni lo," a ti.

MPCC President chuan, MNF policy SEDP chu NLUP leh hmun dang dang aṭanga a ṭhalai leh an duhthusam lakkhawmna a ni ber nia sawiin, "Keini chu kan hotute'n an tuipui leh an hmachhawpte hi kan mite'n an thlawpin an tuipui ṭhin," a ti a; MNF hotupa chu a thil tuipuite a hote'n an tuipui chhunzawm ve lo niin a sawi.

Lal Thanhawla sawi danin, October 8-15, 2018 inkarah power megawatt 60 pe chhuak thei tur Tuirial Hydro Electric Power Project hawn theih a ni dawn a, nakkumah vek hian megawatt pe chhuak thei tur Vankal dáia Solar Power Plant pawh hawn a ni dawn.

MPCC President hian MPCC Commu­nication deptt-in website an siam www.mpccmizoram.org chu a duh apiang tlawh theih turin a hawng nghal a ni.