Sorkarin Citizenship Bill ṭha a ti lo

Mizoram sorkar chuan Citizenship (Amend­ment) Bill, 2016 chu ṭha a ti lo a, ṭha a tih loh thu sorkar laipuia a thlen bakah, Parliament-ah Mizoram MP-te au chhuahtir a tum.

Vanglaini palai zawh­na chhangin chief minister Lal Thanhawla chuan, sorkar bakah Cong­ress party ang pawhin Citizenship (Amend­ment) Bill, 2016 chu ṭha an tih loh thu a sawi a, "Ṭha kan tih loh thu hi sorkar laipuiah thlen ngei kan tum a, an thlen thla tawh mai thei. Kan MP-te pawh Parliament-ah Bill kan duh loh thu hi sawi chhuahtir ngei kan tum," a ti.

Lal Thanhawla chuan, Citizenship (Amendment) Bill, 2016 chu Hindu invulh tumna a nih thu sawiin, "Secularism chu telh ni se a ṭhat tur thu ka lo sawi tawh ṭhin a ni," a ti a; Bill chu an dodal tlat dawn thu a sawi.

Law & Judicial minis­ter Lalsawta pawhin Vanglaini palai zawhna chhangin, Citizenship (Amendment) Bill, 2016 hi a hoa an sawiho tawh thu a sawi a, "Chief Minister-te nena sawi­ho leh kan tum. Kan sawi­honaah hian kan MP pahnihte tel ngei turin kan duh a ni," a ti.