Ruihhlo donaah ṭanrual a ngai - Zira

Federation of Indian NGO's for Drug Abuse Prevention (FINGODAP), Mizoram chuan nimin khan Chanmari YMA Hall, Aizawlah damdawi hman sual laka inven dan inzirtirna hun an buatsaih a, Excise & Narcotics minister R Lalzirliana'n a hmanpui. Minister chuan, "Ruihhlo ngaite hi enkawlna huapzo hmanga puih an ngai a, sorkar, kohhran leh NGO-te'n ṭangruala hma kan lak a ngai," a ti.

R Lalzirliana chuan, Rangvamual leh a chhehvel leh Tuirial vela zu zuar ṭhin zinga 90% vel chuan drug an zuar tawh nia sawiin, hei vang hian Mizoramah drug a pung hle niin a sawi a; "Ruihhlo hi tih chhin miah loh leh khawih miah loh a him ber," tiin, Mizoramah damdawi hman sual vangin ṭhalai 2,000 chuang an thih tawh avangin en liam mai mai chi a ni lo tih a sawi.

Mi ṭhenkhatin ruihhlo tih chu hlimna emaw an ti ṭhin tih sawiin Lalzirliana chuan, "Zu leh drug tite aiin a ti lote an hlim zawk. A ti ṭhinte hlim hun chhung hi a tawi em em. Tih loh hi hlim zawkna a ni tih hriat a pawimawh," a ti a; inkhawma kalkhawm tleirawlte leh ṭhalaite chu an hmalam hun leh hmasawnna tur tichhe theitu a ni tih hre reng turin a chah.

Excise Minister chuan, ruihhlo vangin tleirawlte'n an nu leh pate an bum nasat thu leh ruihhlo ngai enkawl zingah kum 12 mi te, kum 60 chuang tawhte an awm thu a sawi a, "Ruihhlo hian mi tin min chiahpiah a, chhungkaw tinte hi kan him lo a ni ber. Mipa leh hmeichhia a thliar lo a, nasa takin min rún mek a ni," a ti.

Drug Abuse Prevention Awareness Programme-ah hian FINGODAP Mizoram Chapter vice chairman Lalthanchhunga Ralte pawhin thu a sawi a; ruihhlo ti ṭhin sim tawhte'n thu an sawi bawk. Inkhawmah hian Aizawla sikul ṭhenkhata zirlaite leh ruihhlo ngaite enkawlna lama thawkte an tel a ni.