Intihsiaknaa ti thate hnenah lawmman sem
NEDP hnuaia Entrepreneurship Development Scheme (EDS) hmalakna péng pakhat First Micro Start Up Capital Competition-a ti ṭhate hnenah Ningani zan khan IPR auditorium-ah lawmman sem a ni a, chief minister Lal Thanhawla'n a hmanpui.
Chief Minister chuan, sorkar hmalaknaah mirethei te, kut hnathawk te, lo neimi te, inhlawhfate dinhmun siamṭhat leh ṭhalaite tana khawvel thar siamte chu ngaih pawimawh bik a nih thu sawiin, "Kut hnathawktute'n thlamuang taka an mahni khaw bu záwla an nuam tih zawng leh an thawh thiam hmanga eizawnna ngêlnghet an neih nan NLUP kalpui a ni," a ti.
NEDP thil tum lian ber chu ei ṭawk ṭawk dinhmun aṭanga market economy dinhmuna Mizoram hlan kai a ni tih sawiin Lal Thanhawla chuan, "NEDP-ah ṭhalaite an pawimawh dawn. Ṭhalai thluaka eizawng thei tan hun remchang a ni dawn," a ti a; NEDP-ah ṭhalaite tan
Mizoram hmasawnna tur thluak thawhna hun remchang leh ruahmanna ṭha zawk siam turin chona thar chhawpchhuah a ni tih a sawi.
NEDP EDS hnuaia First Micro Start Up Capital Competition hi sum senso lian tham loa sumdawnna thila hna thawh tur siam zawnga bulṭan dan tur inruahmansiak a ni. Intihsiaknaa tel 32 aṭangin ruahmanna ṭha zual 15 thlan chhuah a ni.