Huapzo sorkar siam kan mamawh - Ruatkima

Nimina Mizo Hnam Runa MNF party inkhawmah MNF general secretary Lalruatkima, MLA-in thu a sawi a, "Huapzo sorkar siam kan mamawh tawh," a ti. Tun hnaia pawl pathum thawhho tum (third front) chung­changah, tun aṭangin chief minister turah an ngaihdan a inang lo nghal niin a sawi bawk.

Lalruatkima chuan, CAG-in report an siam­in, ṭan chhan mumal tak an nei a, rin thu an tilang ngai lo tih sawiin, "NLUP hlawhchhamna hrang hrang an tarlante kha thu dik a ni a, ṭawngkam thiam vanga insawi mawi chi a ni lo. NLUP hi Congress sorkar hlawhchhamna symbol a ni," a ti.

Sorkarna chelh mek­tu Congress party chu an tâlbuai hle nia sawiin Lalruatkima chuan, "Chief Minister-in ka thisen zawmpuite pawh ni se, kan party mi leh sa ni lo chu eng atan mah ka ngai lo a ti a, party sorkar ringawt ni lo, huapzo sorkar siam kan mamawh tawh em em a, MNF chuan huapzo sor­kar siam kan tum a ni," a ti a; Congress party chu an hotu lute an in­nghir­ngho mek niin a sawi.

Kum 2018 inthlana MPC, ZNP leh ZEM-te thawhho an tum chung­changah Lalruatkima chuan, "Tuna third front intite hi hmana mite tho kha an ni a, a ṭhing an rawn inher lum thar leh mai chauh a ni," a ti a; thawhho dan chu awm khawm ve si, rilru inhawisan vek an nih thu leh tun aṭangin chief minister turah an ngaihdan a inang lo nghal thu a sawi a ni.

Nimin vek khan MNF ṭhalaite chuan thuchhuah siamin, August 16, 2017 khan Aizawl South-II Block Congress hruaitute lungawi loin Mizoram Synod Moderator chu a pisaah an luh chilh niin an tarlang a, "A âwm lo kan tiin, kohhran zah­lohna lian tak niin kan hria. Hetiang hi thleng tawh lo se kan duh tak zet a ni," an ti.