ILP enfiah beihpui thlakah mi 550 man

Mizoram police-te leh YMA-te'n August 17, Ningani zan khan Mizorama hnam dang awmte'n Inner Line Permit (ILP) an neih leh neih loh enfiah beihpui an thlak a, dan loa Mizorama awm hnam dang mi 550 an man.

Central YMA chuan YMA kumpuan, 'Ram leh hnam humhalh' bawhzuina atan Mizorama YMA branch tinte chu an huam chhung ṭheuhah hnam dang ILP nei lo leh fel lo dap thlak turin a hriattir a; chumi bawhzui chuan YMA branch hrang hrangte chu police nen thawkhoin beihpui an thlak a ni.

He thu ziah lai thlenga CYMA-in a hriat theih chinah, ILP nei lo leh fel lo mi 550 khawm an ni tawh. Aizawl bikah mi 327 man an ni a, Aizawl Police Station-ah mi 175 leh Bawngkawn PS-ah mi 152 dah an ni. District khawpui dang leh Aizawl khawpui páwna YMA leh police-te'n mi 223 an khawm bawk.

Aizawlah chuan ILP nei lo leh fel lo mante chu Aizawl PS leh Bawngkawn PS-ah magistrate-te'n kal chilhin, camp court an nei a, Mizoram hmun danga mante pawh nimin khan Court-ah hruai an ni.