Champhai district-a bank-te'n CD ratio an neih zat tur an pha lo

Champhai District Consultative Committee chu an chairman Vanlalngaihsaka, Champhai DC hoin nimin khan DC conference hall-ah an ṭhu. June 30, 2017 dinhmun thlengin Champhai district-a bank hrang hrangte'n credit deposit ratio (CD ration) an neih zat tur an phak loh thu tarlan a ni.

Meeting-ah hian Cham­phai district chhung­a bank hrang hrangte'n sorkar kum kal meka June 30, 2017 thleng­a an hnathawhte thlirho a ni a; June 30 thlengin Champhai district-a bank hrang hrangte CD ratio chu 58.40% a nih thu leh, chu chuan an target 60% a phak loh thu an tarlang.

Champhaia lead bank chief manager SP Sarmah chuan, bank-te'n priority sector atana loan an pek chhuah ngai zat 40% chu an khûm a, 86.66% an pe chhuak tih a sawi a; Agricultural segment-a loan pek chhuah ngai zat 18%-ah 16.43% an pe chhuak tawh tih a sawi bawk.

Chief Manager tarlan danin, Champhai district-ah hian bank hrang hrangin branch 22 an nei mek a, chu chu mi 5,715-in bank branch pakhat an inṭâwm ang a ni a; Mizoram pumah mi 5,378-in bank branch pakhat an inṭawm ang a ni thung. Champhai district-ah hian ATM booth pakua a awm thu tarlan a ni.

Meeting chuan, thing­tlang leh hmun kilkhawr zawka mite'n bank kal­phung, loan lak leh sum peipun dan an hriat theih nana zirtirna pek chung­chang an sawiho a; bank-in sorkar scheme - PMEGP, DAY_NULM (SEP), MzSRLM leh a dangte an kalpui dan thlir­let bakah, MGNREGS hnuaia inziak lutte tan Aadhaar leh bank account thlun zawm a pawimawh thute an sawiho a ni.