KHAWTHLIR

Thisen pe
Mizoram Chakma Students' Union zonal hqrs., Aizawl member-te chuan nimin khan Aizawl Civil Hospital-ah thisen unit 24 an pe a, a petute mipa 23 leh hmeichhia pakhat an ni.

NLUP sem
Commerce & Industries department chuan Ningani khan Keifang leh Selingah NLUP ṭanpuina an sem a, mi 61 hnenah Rs. 17,93,000 an sem. An hun hmanpuitu, bialtu R Lalzirliana minister chuan, ṭanpuina dawngtute chu an thil dawnah duh tawk mai loin, tih tur leh mawhphurhna an neihte hlen chhuak turin a chah.

Thawhhona thlawp
ZNP sub-headquarters, Lunglei leh ZNP block hrang hrang - Serchhip, Thenzawl, Chalfilh East leh Chalfilh West-te chuan thuchhuah siamin, MPC, ZEM leh ZNP-te thawhho chu an thlawp thu an puang a; kum 2018 Assembly inthlan hunah Mizorama sorkar ṭha a pian theihna tura Pathian remruat a nih an rin thu an tarlang.

Police training
Mizoram Police chuan nimin khan Aizawl SP pisa conference hall-ah ‘One day In-Service Training on Human Rights for Police Personnel’ tih thupui hmangin training an buatsaih a, IGP Zorammawia'n a hawng. Training-ah hian Mizoram hmun hrang hrang aṭangin police 52 an tel a ni.

Career guidance
Kolasib Officers' Club (KOC) bultumin nimin khan Awithangpa Hall, Kawnpuiah career guidance buatsaih a ni. Khuallian, bialtu MLA Hmingdailova Khiangte chuan, ruihhlo leh mipat hmeichhiatna hman sual lakah fimkhur turin zirlai kalkhawmte a chah.

Hnahlanah JICA
JICA Expert team chuan nimin khan Hnahlana kut hnathawktute hmalaknate an tlawh a; Tourist Lodge-ah Irrigation and Water Resource Development (IWRD), Agriculture, Horticulture leh Land Resources, Soil & Water Conservation (LRSWC) deptt hotu te, Hnahlan V/C leh YMA hruaitute leh kut hnathawktute an kâwm bawk.