MBBS-a Mizoram quota seat 17 Kum hmasa aiin seat 8-in a tlahniam

Sorkar laipuia Health & Family Welfare ministry chuan, Central pool-a medical seat a pek zat tur August 18, 2017 khan a tichhuak a, MBBS-a Mizoram quota atan seat 17 dah a ni. Central pool-a Mizoram seat chan zat hi nikum aiin pariatin a tlem zawk.

Bachelor of Medicine, Bachelor of Surgery (MBBS)-ah hian Mizoram chuan Central pool-ah seat 17 a neih dawn bakah hian, North Eastern Council (NEC) hnuaiah seat 11 a nei a, kum 2017-18 atana seat a neih zawng zawng chu seat 28 a ni. Central pool-ah hian Bachelor of Dental Surgery (BDS)-ah seat pathum a nei dawn bawk.

Thu dawn danin, Mizoramin kum 2016-17 khan MBBS-ah seat 25 a nei a, nikum aia kumina seat a neih tlemna chu seat pariat a ni. Kum hmasa lama seat a channa ṭhin medical college ṭha ṭhenkhat, kumina a chan tak loh a awm nual. BDS pawh kum hmasa lamah chuan Central-in seat panga a rawn pe ṭhin a, kuminah chuan pathum chiah a pek avangin seat pahnihin a tlahniam.

Hetih lai hian Meghalaya-te'n Central pool-a MBBS an chan zat chu a pung thung. Meghalaya hian kumina MBBS-ah seat seat 42 leh BDS-ah seat pathum a chang.

Hmar chhak state dang Nagaland-in MBBS seat 30 leh BDS seat 3, Arunachal Pradesh-in MBBS seat 24 leh BDS 3, Manipur-in MBBS seat 5, Sikkim-in MBBS leh BDS seat 3 ve ve, Tripura-in BDS seat 3 an chang a ni.

Central pool aṭanga medical seat allotment tihchhuah a nih tak avang hian, Higher & Technical Education (HTE) department-a Technical Wing chuan counselling an nei thuai dawn.

HTE department hotute hnen aṭanga thu dawn danin, counselling neih hmain inhriattirna hun ni khat tal a ngai a, tun kar chhung chuan counselling neih hman beisei a ni.

NEC hnuaia Mizoramin medical quota a neihah erawh chuan July 27, 2017 khan counselling neih a ni tawh a, zirlai lut turte pawhin admission an ti tawh. NEC hnuaia Mizoramin seat a neih dan chu - RIMS, Imphal-ah zirlai pasarih, NEIHGRIMS, Shillong-ah zirlai pathum, Dibrugarh-ah zirlai pakhat a ni.